Hujumchi Aleksis Sanches yaqin kunlarda “Inter”ni tark etishi mumkin.
Sky Sports Italia xabariga ko‘ra, 33 yoshli futbolchi "neradzurrilar" bilan shartnomasini bekor qilish bo‘yicha muzokaralar olib bormoqda.
Tomonlar shartnomani bekor qilish shartlari bo‘yicha hozircha kelisha olishmayapti, ammo muzokaralar davom etmoqda va yaqin kelajakda yechim topilishi mumkin. Sanchesning "Inter" bilan amaldagi shartnomasi 2023 yilning yoziga qadar tuzilgan.
Romelu Lukaku qaytganidan so‘ng, "Inter" Sanchesni zaxira o‘yinchisi deb hisoblaydi, chunki jamoada hali ham Lautaro Martines, Edin Jeko va Xoakin Korrea bor. Shuning uchun "Inter" Aleksisdan qutulmoqchi. Klub shundan so‘ng asosiy e’tiborni himoyaga yangi futbolchi sotib olishga qaratmoqchi.
Chililik futbolchiga "Marsel" qiziqish bildirmoqda. Biroq, mumkin bo‘lgan transfer haqida gapirishga hali erta, chunki Sanches bilan shartnoma imzolash uchun fransuz klubi birinchi navbatda hujumkor o‘yinchilardan biri bilan xayrlashishi kerak.
Avvalroq, “Inter” yana bir chililik Arturo Vidal bilan shartnomani bekor qilgandi. U "Flamengo"ga ko‘chib o‘tdi.
Sanches “Inter” safida 2020 yil sentyabridan buyon to‘p tepadi. U klub safida 108 ta o‘yinda maydonga tushib, 20 ta gol urgan va 23 ta golga assistentlik qilgan.
