"Napoli" bosh murabbiyi, italiyalik Luchano Spaletti shu yozda Neapolni shartnomasi tugaganidan keyin tark etgan belgiyalik hujumchi Dris Mertensni jamoada ko‘rishni istamasligi haqidagi mish-mishlarga izoh berdi.
"Eshitishimcha, men Mertensning yangi shartnoma imzolashini xohlamaganman emishman, bu haqiqat emas! "Napoli" ham uning ketishini istamadi, Mertens jamoaga yordam bergan bo‘lardi. Klub unga shartnomani uzaytirish bo‘yicha taklif bilan chiqdi, ammo u rozi bo‘lmadi", - deya Spalletti so‘zlarini keltiradi italiyalik jurnalist Nikolo Skira ijtimoiy tarmoqdagi sahifasida.
Eslatib o‘tamiz, 2021/2022 yilgi mavsumda "Napoli" A Seriyada uchinchi o‘rinni egallab, Chempionlar ligasiga yo‘llanma oldi. Shu yozda jamoaga avval Qozonning “Rubin” klubida to‘p tepgan gruziyalik vinger Xvicha Kvarasxeliya kelib qo‘shildi.
