Hindistonning Chennay shahrida o‘tkazilayotgan shaxmat olimpiadasida 7-tur o‘yinlari yakunlandi. O‘zbekiston erkaklar terma jamoasi bugun Peru ustidan 4:0 hisobida g‘alaba qozongach, 12 ochko bilan jadvalda 2-o‘ringa ko‘tarilib oldi. Peshqadam Armaniston hisobida esa 13 ochko mavjud.

Terma jamoamiz 8-turda Germaniyaga qarshi bahslarda ishtirok etadigan bo‘ldi. Ushbu jamoa 7-turdan so‘ng 12 ochko bilan 6-pog‘onani egallab turibdi. Nemislar musobaqada 9-reyting pog‘onasiga ega. Armaniston Hindistonning birinchi jamoasi bilan, AQSH esa mezbonlarning ikkinchi jamoasiga qarshi ertaga dona surishadi.

O‘zbekiston ayollar terma jamoasi bugungi mag‘lubiyatdan so‘ng 45-o‘ringa tushib ketdi. Qizlarimiz ertaga Shimoliy Makedoniyaga qarshi bahslarda ishtirok etishadi. Ushbu jamoa musobaqada 27-pog‘onada saralangan bo‘lib, ayni paytda 71-o‘rinni egallab turibdi.

Ertangi bahslar ham odatdagidek Toshkent vaqti bilan 14:30da start oladi.