Krishtianu Ronaldu yakshanba kungi 1 tur bahsi oldidan Instagram'dagi sahifasida o‘zini o‘yinga tayyor deb e’lon qilgandi. Shunga qaramay, Erik ten Xag 37 yoshli yulduzni zaxirada qolishga majbur qildi; "MYU" yakunda mag‘lubiyatga uchradi. Bu voqeadan keyin haqli savol tug‘iladi: xo‘sh, "Manchester Yunayted" Ronaldusiz qolishga tayyormi?
Erik ten Xagning asosiy tarkibning hujumini tashkil qilishi biroz g‘alati edi. Negaki, u Eriksen hamda Fernandeshdan almashib, "yolg‘on to‘qqizlik" hosil qilishda foydalanmoqchi bo‘ldi. Bu juftlik esa birinchi bo‘limda boshini quyi solgancha maydonni tark etdi. Negaki, ularning har ikkisida ham gol urish uchun yetarli imkoniyat bor edi. Xususan, Fernandesh bir necha metrdan to‘pni osmon-u falakka tepgan bo‘lsa, Eriksen uni darvozabonning qo‘liga sovg‘a qildi. Shunday qilib, "MYU"ning 1 turdagi birinchi bo‘limi, biz tarixda ko‘rgan eng yomonlaridan biriga aylandi.
Eriksen hamda Fernandesh o‘ynagan nuqtalarda o‘tgan mavsumda Ronaldu juda katta ishlarni amalga oshira olgandi. Uning yo‘qligi esa hujum deb atalmish chiziqni amalda yo‘qqa chiqardi. Kechagi o‘yinning 52 daqiqasidagina Ronaldu maydonga tushdi va Fredni almashtirdi. Umuman olganda, Erik ten Xagning Ronaldusiz o‘yinni boshlashi, portugaliyalik yulduzni nima uchun jamoadan ketishni istayotganiga mantiqiy javob bo‘la oladi. Lekin bu yerda masalaning boshqa bir tarafi bor. Ronaldu maydonga tushganidan keyin "MYU"ning o‘yinida o‘zgarish yuz berdi: jamoa yaxshiroq, tezroq va tajovuzkorroq harakat qila boshladi. Muxlislar ham Ronalduni maydonda ko‘rib, yaxshiroq qo‘llab-quvvatlashni boshladi. Qisqa qilib aytganda, butun bir stadionda atmosfera yaxshi tomonga o‘zgardi.
Kechagi o‘yinda Ronalduning jamoaga bo‘lgan ta’siri hamon yuqoriligini bilib olish qiyin emas, albatta. Uning maydondaligi, "MYU" tomonidan yaratilgan xavfli vaziyatlarni ortishida ham o‘z aksini topgandi. Xususan, u bitta aniq uzatma orqali jamoadoshi Reshfordni birga-bir vaziyatga olib chiqdi. Ammo "MYU"ning o‘ninchi raqamli hujumchisi darvozabonni dog‘da qoldirishga ojizlik qildi. To‘g‘ri, keyinchalik u vaziyatda offsayd qayd etildi. Ammo takroriy lavha VAR ishga tushishi mumkinligini ko‘rsatdi. Shunday qilib, Erik ten Xag Ronaldu haqida jiddiy o‘ylab ko‘rishi kerak. Negaki, uning ta’siri hali ham baland. Usiz "MYU"ni qurishga ancha vaqt ketadi. Ronalduni maydonda bo‘lishi esa, jamoaga uzoq bo‘lmagan motivasiya beradi. Ya’ni, Ronaldusiz "MYU" – ko‘p vaqt qurilishi kerak. U bilan esa klub tizimsiz qolaveradi.
ISMATOV J.
