Hindistonning Chennay shahrida bo‘lib o‘tayotgan Butunjahon shaxmat olimpiadasi ertaga yakuniga yetadi. Ertaga hal qiluvchi — 11-tur bahslari o‘tkaziladi.
O‘zbekiston erkaklar terma jamoasi so‘nggi turni Niderlandiyaga qarshi o‘tkazadigan bo‘ldi. Ushbu jamoa musobaqada 7-saralash pog‘onasiga ega bo‘lib, ayni paytda 15 ochko bilan 5-o‘rinni egallab turibdi. Niderlandiyaning musobaqa davomidagi eng kuchli raqibi Eron bo‘lib, 9-turda bu jamoa bilan durang o‘ynashgandi. Jamoaning birinchi raqamli shaxmatchisi Anish Giri hisoblanadi. U 2760 reyting ochkosiga ega. Giri turnirda 8ta o‘yin o‘tkazib, 6 ochko jamg‘ardi (hali yutqazmadi).
O‘zbekiston kabi 17 ochko jamg‘arib turgan Armaniston so‘nggi turda Ispaniyaga qarshi o‘ynaydigan bo‘ldi. Hindiston-2 Germaniya bilan to‘qnash kelsa, AQSH Hindistoning birinchi jamoasi bilan o‘ynaydi.
Ertaga yigitlarimiz g‘alaba qozonishsa, chechmpionlikni qo‘lga kiritadi. Durang ham bizga katta ehtimol bilan kamida bronza medalini taqdim etadi. Mag‘lubiyat haqida esa hozircha o‘ylamaymiz.
O‘zbekiston ayollar terma jamoasi Paragvay ustidan qozonilgan g‘alabadan so‘ng 39-o‘ringa ko‘tarilib oldi. Qizlarimiz so‘nggi turda Kosta-Rikaga qarshi o‘tkazishadi. Ushbu jamoa turnirda 63-o‘rinda saralangan.
So‘nggi tur bahslari Toshkent vaqti bilan 09:30da boshlanadi. Tushdan so‘ng g‘olib va sovrindorlarini taqdirlash marosimi bo‘lib o‘tadi.
