"Real" hujumchisi Karim Benzema UYEFA Superkubogi uchun Frankfurtning "Ayntraxt"iga qarshi o‘yin oldidan jamoa g‘alaba yo‘lida davom etishi kerakligini aytdi.

"Barcha yirik klublar o‘zlari boshdan kechirishlari kerak bo‘lgan bosim haqida gapirishadi, ammo menimcha, bu boshqa joylardan ko‘ra "Real Madrid"da ko‘proq. "Real Madrid" dunyodagi eng buyuk klub ekanligini hisobga olsak, har safar imkoniyat bo‘lganda uyga sovrinlarni olib kelish kerak.

Chorshanba finali. Biz g‘alaba qozonishni xohlaymiz. "Real"da o‘ynasang, boshqa maqsad bo‘lmaydi. Bu o‘yinda ishtirok etish uchun Chempionlar ligasida g‘alaba qozonish kerak. Bu oson ish emas. Biz uni bajardik. Endi bu g‘alabali yo‘lni davom ettirish kerak", - deya Benzemaning so‘zlarini keltiradi UYEFA matbuot xizmati.

“Real” – “Ayntraxt” uchrashuvi 10 avgust, chorshanba kuni Xelsinkida (Finlyandiya) bo‘lib o‘tadi. Uchrashuv Toshkent vaqti bilan soat 23:59'da boshlanadi.