"Liverpul" yarim himoyachisi Nabi Keyta ushbu transfer oynasida jamoani tark etmaslik ehtimoli katta, deya xabar beradi Goal.

Manbaga ko‘ra, ingliz klubi 27 yoshli gvineyalik futbolchining agenti bilan shu oy boshida muzokara o‘tkazgan va ular yaxshi munosabatlar o‘rnatishgan. "Liverpul"ning rejasi hamon futbolchi bilan shartnomani uzaytirish.

Keytaning amaldagi shartnomasi 2023 yilgacha mo‘ljallangan. Transfermarkt portali futbolchining narxini 25 million yevroga baholamoqda.

Keyta "Liverpul"da 2018 yildan beri o‘ynab kelmoqda. O‘tgan mavsumda u barcha turnirlarda 40 ta o‘yinda maydonga tushib, 4 ta gol urdi va 3 ta golga assistentlik qildi.