"PSJ"ning argentinalik hujumchisi Mauro Ikardi faoliyatini APLda davom ettirishi mumkin, deya xabar beradi jurnalist Fabrisio Romano o‘zining Twitter sahifasida.
Manbaga ko‘ra, futbolchining vakillari uning xizmatlarini "Manchester Yunayted" va "Nyukasl"ga taklif qilishgan. Shu bilan birga, hujumchi bosh murabbiy Kristof Galtye uni rejalariga kiritmaganiga qaramay, "PSJ"ni tark etishni istamayapti.
29 yoshli Ikardi o‘tgan mavsumda "PSJ" safida 30 o‘yinda atigi 5 ta gol urdi. Uning klub bilan shartnomasi 2024 yilning yoziga qadar mo‘ljallangan.