"Real" yarim himoyachisi Kazemiro "Manchester Yunayted"ga o‘tishga tayyor. Marca xabariga ko‘ra, 30 yoshli braziliyalik futbolchi "Manchester Yunayted"dagi vaziyatni baholamoqda va jamoa mavjud muammoli vaziyatni tezda bartaraf eta oladimi yoki yo‘qligini tahlil qilmoqda. "Real Madrid" futbolchini saqlab qolishga qat’iy qaror qilgan, ammo futbolchi Manchesterga o‘tishni xohlasa, uni qo‘yib yuboradi.
"Manchester Yunayted" Kazemiro variantini qanday o‘ylab topdi
"Manchester Yunayted" "Yuventus"dan Adryen Rabyoni sotib olishga urinib ko‘rdi, ammo maosh borasida futbolchi bilan kelisha olmadi. Adryen va uning onasi Veronika juda ko‘p maosh talab qilishdi. Qolaversa, ingliz klubi "Barselona" yarim himoyachisi Frenki de Yongning rad javoblaridan charchagan. "Yunayted" markaziy yarim himoyasini kuchaytirish uchun Kazemiro variantiga o‘tishga qaror qildi.
"Manchester Yunayted" bosh murabbiyi Erik ten Xagning shaxsan o‘zi 30 yoshli futbolchini jamoada ko‘rmoqchi. Kazemiro "Real Madrid"ning juda muhim elementi bo‘lib qolmoqda, biroq bir qancha omillarni hisobga olish kerak. Bu yozda "Real Madrid" Eduardo Kamavinga va Dani Sebalyos bilan birgalikda Kazemironing ketishini tenglashtirishga qodir bo‘lgan Aureliyen Tchuameni bilan shartnoma imzolash orqali tayanch yarim himoyani kuchaytirdi. Tajribali Toni Kroos va Luka Modrichni aytmasa ham bo‘ladi.
Kazemironing Transfermarkt'dagi bozor qiymati hozirda 40 million yevroni tashkil etadi. U mavsum davomida 30 million yevroga arzonlashdi va bu unchalik yoqimli bo‘lmagan ko‘rsatkich bo‘yicha dunyoning eng yaxshi 5 futbolchisi qatoriga kiradi.
Marca bosh muharriri Xose Feliks Dias va boshqa ispan jurnalistlari Chiringuito dasturi efirida ehtimoliy transfer haqida qiziqarli tafsilotlarni aytib berishdi. Kazemiro "Manchester Yunayted"dan "super takliflar" oldi.
Ayni damda yarim himoyachi "Real" bilan 2025 yilgacha mo‘ljallangan shartnomaga ko‘ra yiliga 8 million yevro maosh oladi. “Qizil iblislar”ning taklifi esa hozirgi maoshidan ikki baravar katta. COPE muxbiri Arancha Rodriges "Manchester Yunayted" braziliyalik futbolchi bilan 5 yillik shartnoma imzolamoqchi ekanligiga oydinlik kiritdi.
Kelishuv amalga oshsa, "Real Madrid" ham yaxshiga pulga ega bo‘ladi. Braziliyalik futbolchining shartnomasidagi tovon puli 500 million yevroni tashkil etadi. Telegraph xabariga ko‘ra, "Manchester Yunayted" yarim himoyachi uchun kamida 60 million yevro to‘lashga tayyor. Bu summa 70-80 million yevrogacha oshirilishi mumkin.
Nega Kazemiro "Manchester Yunayted"ga o‘tishga qiziqishi mumkin?
Kazemiro "Real Madrid"dagi 8 yillik faoliyati davomida 17 ta sovrinni qo‘lga kiritdi, jumladan, 5 ta Chempionlar Ligasi sovrini. U Karlo Anchelotti jamoasining muhim va hurmatli a’zosi. Bir qarashda hozirgi “Manchester Yunayted” kabi klublarning takliflarini darhol rad etishi kerak bo‘lgan muvaffaqiyatli futbolchi. Ammo braziliyalik inglizlarning taklifi haqida o‘ylamoqda.
Kazemironing nima haqida o‘ylayotgan bo‘lishi mumkin? Unga futboldagi katta shartnomasiga ega bo‘lish uchun so‘nggi imkoniyat beriladi. "Yunayted" uni faoliyatining qolgan qismi uchun yaxshigina maosh bilan siylashi mumkin.
Qolaversa, “Manchester Yunayted” hali ham Yevropadagi eng kuchli Premyer-liga klubi maqomini hech kimga berib qo‘yganicha yo‘q. Ular hozir har bir jamoada kuzatiladigan inqirozdan chiqib ketishlari kerak.
Ten Xag Krishtianu Ronaldu bilan birga jamoaning asosiy yulduziga aylanadigan Kazemiroga to‘liq ishonadi. Aytgancha, aynan braziliyalikning transferi portugaliyalikni Chempionlar ligasida o‘ynaydigan jamoaga ketishdan to‘xtashi mumkin. Boshqa futbolchilar va butun futbol jamoatchiligi “Manchester Yunayted” loyihasiga ishona boshlaydi.
Iyul oyida Kazemiro agar La Ligadan boshqa chempionatda o‘ynay olsa, Premyer-ligani tanlashini aytgandi. So‘zlarni haqiqatga aylantirish vaqti kelmadimi ekan?
