Tomas Tuxelning "Chelsi"dan chetlatilishiga uning Krishtianu Ronalduga nisbatan pozisiyasi sabab bo‘lgan.

The Telegraph nashrining yozishicha, Ronalduning "Manchester Yunayted"dan ehtimoliy transferi muhokama qilinar ekan, Tuxel va klub xo‘jayini Todd Boelining qarashlari qanchalik farq qilishi aniq bo‘ldi.

Boeli Tuxelning Ronaldu bilan shartnoma imzolash taklifini qat’iyan rad etganidan qoniqmadi. Nemis nega portugaliyalikni jamoada ko‘rishni istamaganini tushuntirishi kerakligidan g‘azablandi.

Qolaversa, Tuxel transfer oynasi vaqtida klub unga yuklagan qo‘shimcha mas’uliyatni yoqtirmasligini aniq aytdi. "Chelsi"ning egalari Boeli va Klerleyk murabbiyga transfer qarorlarini qabul qilishda ko‘proq erkinlik berishdi.

Petr Chex klubni tark etgach, Tuxelning hafsalasi pir bo‘ldi va shanba kuni murabbiy "Chelsi" rahbarlariga sport direktorini tanlashda ishtirok etmasligini aytdi.

Avvalroq Tuxelning "Chelsi"dan chetlatilishiga jamoaning natijalari sabab bo‘lmagani ma’lum bo‘lgandi.