"Manchester Siti"ning muvaffaqiyatlari ortida nima turgani haqida ko‘p gapiriladi. Ammo bu borada birinchi omil sifatida pul masalasini aytishimiz mumkin. Klub yuksalishi, top-jamoaga aylanishi hamda sovrinlar yutishida unga kiritilgan investisiyaning roli beqiyosdir. Quyida "shaharliklar"ning yulduzli tarkibi haftalik qancha maosh olishi haqida gaplashamiz.
Erling Xoland Angliya futbolidagi katta hodisalardan biridir. U "Manchester Siti"ga olib kelindi. Ayni damda APLda norvegiyalikka haftalik 375 ming funt maosh to‘lanmoqda. Shunga yarasha Xoland ligani zabt etishga ulgurdi va to‘purarlar bahsida yetakchilik qila boshladi. 22 yoshli hujumchi jami 7 ta o‘yinda ishtirok etib, 12 gol urishga erishdi. Ammo shunday katta figura jamoaning eng kӯp maosh oluvchisi emas. U bu borada ikkinchi o‘rinda. Yetakchilik esa kimga tegishli ekanini quyida bilib olasiz...
Ha, sezib turganingizdek, "shaharliklar" safida Kevin De Bryuyne eng ko‘p maosh bilan ta’minlangan. Jamoa sardori 2021 yilning aprelida haftasiga 400 ming funt maosh berishni ko‘zda tutuvchi shartnomani imzolagan edi. Ushbu ikki "sariq"lardan keyin, uchinchi o‘rinni Jek Grilish egallaydi. O‘tgan mavsum boshida 100 million funtga xarid qilingan futbolchi, haftasiga 300 ming funt maosh oladi. Keyingi pog‘onada Angliya terma jamoasi himoyachisi Jon Stounz turadi. Xabarlarga ko‘ra, u 250 ming funt uchun bir hafta davomida jamoada ishlashga kelishib olgan. Beshinchi o‘rinda yarim himoyachi Rodri keltirilgan. U har hafta o‘z uyiga 220 ming funtni olib ketadi.
Yuqorida ko‘rib turganingizdek, "Manchester Siti" futbolchilaridan pulni ayamaydi. Yaqindagina jamoaga kelib qo‘shilgan Manuel Akanji 180 ming funt evaziga "shaharliklar"ga xizmat ko‘rsatadi. Keyingi o‘rinni 160 ming funt bilan Ruben Diash band etgan. Yozgi xaridlardan yana biri bo‘lgan Kalvin Fillips ham ancha katta maoshga ega. Sobiq "Lids" vakili haftasiga 150 ming funt ishlab topadi. Shuningdek, Bernardu Silva ham u bilan teng maoshga ega. O‘tgan mavsumda 38-turda hal qiluvchi golni urib, "shaharliklar"ga titul taqdim etgan Ilkay Gyundogan 140 ming funtni bir haftalik mehnatlari uchun qabul qiladi. Riyad Maxrez hamda Emerik Lyaportlar bir xil, 120 ming funt maosh olishi belgilangan.
Tarkibning qolgan futbolchilarida bu boradagi ko‘rsatkichlar quyidagicha:
Kayl Uoker - 110 ming funt / hafta;
Natan Ake - 92 308 funt / hafta;
Joao Kanselu - 80 ming funt / hafta;
Ederson - 65 ming funt / hafta;
Fil Foden - 65 ming funt / hafta;
Stefan Ortega - 55 ming funt / hafta;
Xulian Alvares - 50 ming funt / hafta;
Koul Palmer - 12 462 funt / hafta.
ISMATOV J.
