Yurgen Klopp uchun «qora kunlar» davom etmoqda. APLda bemajol start olgan «Liverpul» (dastlabki 6 turda atigi 9 ochko va 7-o‘rin!) YECHL guruh bosqichi startida ham o‘ta noshud ko‘rindi.

Germaniyalik mutaxassisning tajovuzkor jamoasi Neapolda «Napoli»ga aytarli qarshilik ko‘rsatolmadi - 1:4 hisobli mag‘lubiyat bunga dalil.

Goal ma’lumoti bo‘yicha aytsak, o‘zi «Napoli» Yurgen Klopp jamoalari uchun eng noqulay raqiblardan biri hisoblanadi. Har holda, germaniyalik tan olingan mutaxassis 7 sentyabr oqshomi shovqinli «San-Paolo» stadionida 4-marta mag‘lublikni tan oldi. Kloppning murabbiy sifatida Neapolga birinchi tashrifi 2013 yili kuzatilgan bo‘lib, o‘shanda «Borussiya» D. ortga 1:2 hisobidagi mag‘lubiyat bilan qaytgandi. 

Klopp «San-Paolo»dagi keyingi 3ta omadsiz o‘yinni «Liverpul» boshqaruvida o‘tkazdi. Diqqat qiling, «qizillar» bunda 1tagina gol urib, 7ta qo‘yib yuborishdi. «Liverpul» 2018 va 2019 yillarda ham «Napoli»ga qarshi safar o‘yinlarida hech narsa qilolmagandi. Bu safar esa 4ta gol qo‘yib yuborgan holda, mutlaq mag‘lubiyatga duch keldi. Ha, Yurgen Klopp va «Liverpul» uchun «San-Paolo»da oson emas. 

Fakt. «Napoli» CHLning 1ta o‘yinida Yurgen Klopp boshqaruvidagi «Liverpul» darvozasiga 4ta gol urgan ikkinchi klub bo‘ldi. «Qizillar» bunga qadar faqat 2018 yilning 2 may kuni CHL yarim final o‘yinida «Roma»dan 4ta gol qabul qilishgandi (2:4). Umuman, «Liverpul» Neapol safariga qadar 2021 yilning fevralidan buyon 1ta o‘yinda 4ta gol qo‘yib yubormagandi. O‘shanda jamoa APL doirasida «Manchester Siti»ga 1:4 hisobida yutqazgandi.