Natan Ake
Ake "Chelsi" bilan besh yil davomida birga bo‘ldi. Ammo shu vaqt davomida faqat yettita APL o‘yinida ishtirok etgan xolos. Keyinchalik niderlandiyalik himoyachi "Riding", "Uotford" va "Bornmut"da ijarada yurdi. 2017 yilda "Chelsi" uni "Bornmut"ga 20 million funt evaziga sotib yuborgan. Uch yil davomida Ake "giloslar" safida jami 121 ta bahsda qatnashdi. 2020 yilda 26 yoshli futbolchi "Manchester Siti" safiga yo‘l olgan. U "shaharliklar" bilan birga APL chempionligini qo‘lga kiritdi.
Patrik Bemford
Bemford ham "Chelsi"ning tuganmas ijaralarida yurishga majbur bo‘lgan. Besh yilda olti marta ijaraga berilgan hujumchi, 2017 yilda "Midlsbro"ga sotib yuboriladi. 2018 yilda "Lids"ga o‘tgan Bemford, o‘z jamoasining asosiy vakiliga aylanadi. Uning jamoasi 2020 yilda APLga qaytib, u yerda qolishga muvaffaq bo‘ldi.
Kevin De Bryuyne
Hozirga qadar bu hikoya haqida bilmagan muxlis qolmadi hisob. Ammo shunday bo‘lsada, qisqacha aytib o‘tmoqchimiz. Belgiyalik futbolchi 2012 yilda "Genk"dan xarid qilinadi. "Chelsi" yarim himoyachiga 7 marta imkon bergan xolos. 2014 yilda esa uni "Volfsburg"ga pullaydi. Bugun Gvardiola De Bryuyne bilan Angliya va Yevropani titratishda davom etmoqda.
Radamel Falkao
APLda kolumbiyalik hujumchining hech omadi kelmaydi. U "Chelsi"da ham, "MYU"da ham o‘zini ko‘rsata olmagan edi. Falkao "Chelsi"da 12 ta o‘yin o‘tkazib, atigi 1 ta gol urgan. Ko‘p o‘tmay, u yana "Monako"ga qaytadi. Uning qaytishi esa katta voqelikka aylangan. Uch mavsum davomida Falkao jami 70 ta gol urib, monakoliklarni Fransiya chempioni qiladi.
Torgan Azar
Hozirda Belgiya terma jamoasining asosiy figurasi bo‘lgan futbolchi, "Chelsi"ga o‘z akasi, Eden Azar bilan keladi. Ammo ukaning omadi kulmaydi va ijaraga yuboriladi. U jami 5 yil davomida ijaralarda yurdi. Azarning eng yaxshi jamoalaridan biri "Myunxengladbax" bo‘ldi. Ayni damda esa qahramonimiz "Borussiya Dortmund" safida harakat qilmoqda.
Romelu Lukaku
"Chelsi" 2011 yilda 17 million funt evaziga "Anderlext"dan yosh qora tanli hujumchi sotib oladi. Uning ismi Lukaku edi. Atigi 10 ta bahsda maydonga tushirilgan futbolchi, ijaraga ketadi. Ammo u, kutilmaganda "Vest Brom" va "Everton"da porlay boshladi. 2014 yilda "Everton" Lukakuni sotib oladi. Ko‘p o‘tmay "MYU" belgiyalik uchun xaridorga aylandi. Lukaku mana shu davrda jami 96 ta gol urishga muvaffaq bo‘lgan. 2019 yil uning yo‘li Italiya tomonlarga tushdi. Lukaku "Inter" safida 64 gol urib, jamoani chempionlik shohsupasiga yetakladi. Ammo uning "Chelsi"ga qaytishi omadli kechmadi. 100 million funt havoga uchdi va Lukaku yana "Inter"ga qaytib keldi.
Skott Parker
"Chelsi" 2004 yilda "Charlton"dan yarim himoyachi xarid qilgan. Parker Londonga keladi. U Mourinyo tomonidan Lempard hamda Makeleleni zaxiradagi varianti sifatida ko‘riladi. Parker "Chelsi"dan ketadi. Keyinchalik, bu futbolchi "Tottenxem", "Vest Xem" hamda "Fulxem"da nom qozondi. Skott uchta London klubida jamo 400 dan ortiq bahsda ishtirok etdi.
Muhammad Saloh
De Bryuyne hikoyasidan ham ko‘ra mashhuroq voqea Salohga tegishli. Muhammad "Chelsi"dan ketib yaxshi ish qilgan. Bugun misrlik hujumchi o‘z nomiga ega bo‘lishida "Liverpul"dagi faoliyati katta ahamiyat kasb etdi. "Chelsi"dan ketish esa hammasining boshlang‘ich nuqtasi edi...
ISMATOV J.
