Xalqaro futbol federasiyasi (FIFA) prezidenti Janni Infantino Indoneziyadagi stadionda yuz bergan fojia haqida gapirdi. Eslatib o‘tamiz, arenadagi tiqilinch paytida 174 kishi halok bo‘lgan edi.

"Futbol olami Indoneziyadagi fojiali voqealardan hayron qoldi. Bu futbolni sevadigan har bir kishi uchun qora kun. Halok bo‘lganlarning oila a’zolari va yaqinlariga chuqur hamdardlik bildirmoqchiman. Bizning barcha fikrlarimiz va ibodatlarimiz qurbonlarning qarindoshlari va Indoneziya xalqi bilan”, - dedi Infantino

Eslatib o‘tamiz, fojia Indoneziya chempionatining Malang shahridagi “Kandjuruxan” stadionida bo‘lib o‘tgan “Arema” – “Persebaya” (2:3) uchrashuvidan keyin sodir bo‘ldi.

Final hushtagi yangragach, muxlislarning notinch xatti-harakatlari tartibsizlikka aylanib ketdi. Muxlislar maydonga chiqib ketishdi – ular bilan polisiya o‘rtasida to‘qnashuv bo‘ldi. G‘azablangan muxlislar xavfsizlik kuchlari tomon turli xil narsalarni uloqtira boshladilar, polisiya bunga javoban tayoq va ko‘zdan yosh oqizuvchi gazni qo‘llashdi. Huquqni muhofaza qilish usullari olomonda vahima uyg‘otdi. Muxlislar tarqala boshladilar va ko‘plab odamlarning o‘limiga sabab bo‘lgan tiqilinch yaratishdi.