Argentina milliy jamoasi mashg‘uloti jarayonida kutilmagan holat yuz berdi:

Lionel Messining «Atletiko» yarim himoyachisi Rodrigo de Paulga nisbatan hazili jiddiy janjalga aylanib ketishi hech gap emasdi. Gap shundaki, «matraschi» jamoa sardorining harakatini to‘g‘ri qabul qilmadi. Faqat o‘rtada nimadir bo‘lishiga boshqa futbolchilar yo‘l qo‘yishmadi.

E’tiborlisi, Rodrigo shu «to‘qnashuv»­dan keyin butun mashg‘ulot davomida «PSJ» hujumchisini alohida ta’qib ostiga oldi, to‘g‘ri, u bunda jiddiylashgani yo‘q. Shunchaki, Leo haziliga qandaydir javob berishni xohladi, chog‘i. Muhimi, ular mashg‘ulot yakunlangach, maydondan tabassum bilan chiqib ketishdi. Aslida de Paul va Messi - azaliy do‘stlar. Deylik, ikkisi oxirgi Amerika kubogi finalida Braziliya termasiga qarshi yelkama-elka turib, kurashdi. Rodrigo o‘sha o‘yindan so‘ng Messi haqida alohida gapirgandi: «Amerika kubogi finali kuni ertalab mate ichish uchun yig‘ildik. Bunda Papu Gomes va men birinchi bo‘lib turdik. Kun bo‘yi asosan Messini kuzatdim. Chunki o‘yin arafasida xavotir, asabiylik, qo‘rquv yo‘q emasdi. Finallar oldidan ba’zilar o‘zlarini yaxshiroq nazorat qilishadi, ayrimlar yomonroq. Bosimni sezmasligi haqida gapiradiganlar - yolg‘onchi. Qisqasi, mate ho‘plab turib ham, Messiga obdon qaradim, uning uchun g‘alabadan boshqa variant yo‘q edi. Yana «Marakana»da Braziliya termasi va Neymarga qarshi o‘yinda. Jannatga yoki do‘zaxga...

Umuman, Amerika kubogi Leo uchun zo‘r tus oldi: samarali uzatmalar, gollar. O‘shanda unga qo‘shimcha dalda berishni o‘yladim: «Leo, bugun sening kuning...». U jilmayib javob berdi: «Ha, ha...». Keyin mate quyib berdi. Futbolchining o‘z orzusini ro‘yobga chiqarish imkoniga ega bo‘lishi - bu katta rohat». Xullas, Rodrigo va Leo o‘rtasidagi kichik tushunmovchilikni shunchaki, o‘xshamagan hazilga yo‘yish kerak. Muhimi, hazilning zili chiqmadi-ku...