O‘zbekiston U-17 terma jamoasi bosh murabbiyi Jamoliddin Rahmatullayev bugun matbuot anjumanida ishtirok etib, ertaga boshlanadigan Osiyo chempionati saralash bosqichi oldidan o‘z fikrlari bilan o‘rtoqlashdi.

— Barchani futbol bayrami bilan tabriklayman. Biz bu saralash bosqichiga yaxshi tayyorgarlik ko‘rdik deya olaman. Yaxshi yig‘inlar va o‘yinlar o‘tkazdik. Barchasi optimal darajada. Bolalarda ham motivasiya yetarli, ularning ko‘zi yonib turibdi.

Raqiblar haqida
— Bu bosqichda barcha jamoalar kuchli. Lekin biz o‘z yurtimizda, muxlislarimiz oldida o‘ynaymiz. Bu bizga yordam beradi va bolalarga qo‘shimcha kuch beradi. Koreya Respublikasi har doim kuchli raqib hisoblanadi. Bizda ularni o‘rganishga yetarli vaqt bo‘ldi. Tahlil qildik. Ularning kuchli va zaif tomonlarini ko‘rib chiqdik. Xudo xohlasa, bu jamoaga qarshi o‘yinga tayyormiz.

Tarkib haqida
— Qaysidir futbolchini maqtab, kimnidir tanqid qilishni xohlamayman. Biz eng yaxshi darvozabonlarni saralab oldik. Ular musobaqaga tayyor.

Shri Lankani musobaqada ishtirok etmasligi
— Biz bunday holatlarga doim tayyormiz. Bu bizga ruhan ta’sir qilmaydi. Oldimizda 2 ta o‘yin bor. Barchasi o‘zimizning qo‘limizda. Ularni mag‘lub eta olsak, keyingi bosqichga albatta chiqamiz.

Polshadagi turnir haqida
— Har bir turnirda maksimal darajada yaxshi ishtirok etishga harakat qilamiz. Lekin bu turnirda asosan bolalarni ko‘rib oldik. Barcha 20 nafar futbolchiga bir xil imkoniyat berishga harakat qildik. Shu sababli bor e’tiborimizni asosiy musobaqaga qaratdik. Maqsadimiz Yevropaning kuchli jamoalariga qarshi o‘yinlarda xato va kamchiliklarimizni ko‘rib olish edi.  

O‘zbekiston U-17 terma jamoasi futbolchisi Laziz Mirzayev:

— Bu bosqichgacha yaxshi o‘yinlar o‘tkazdik. Osiyoning top jamoalari bilan o‘ynadik. Bu bizga yetarlicha tajriba berdi deb ayta olaman. Murabbiylarimiz doimiy ko‘nikmalar berib kelmoqda. O‘z uyimizda bo‘ladigan o‘yinlarga tayyormiz.

Bosim haqida
Bizda bosim yo‘q. Jamoaning kayfiyati yaxshi. Uyimizda o‘tadigan o‘yinlarda ijobiy natijalar qayd etishga harakat qilamiz.