2023 yilning mart oyida O‘zbekiston maydonlarida bo‘lib o‘tadigan U-20 Osiyo kubogi musobaqasiga tayyorgarlik ishlari qizg‘in davom etmoqda. Xususan, O‘FA ishchi guruhi tomonidan o‘yinlar va mashg‘ulotlar bo‘lib o‘tadigan hududlar hamda u yerdagi mavjud sharoitlar o‘rganilib, OFK standartiga mos kelishini ta’minlash bo‘yicha sa’y-harakatlar olib borilyapti. Ayni kunlarda Osiyo futbol konfederasiyasi delegasiyasi mamlakatimizda bo‘lib turibdi. Bugun OFK delegatlari va O‘FA tashkiliy qo‘mita vakillari Farg‘ona viloyatiga tashrif buyurishdi.

Kun tartibiga ko‘ra, dastlab hududdagi futbol infratuzilmasi inspeksiya qilindi hamda viloyatning bosh stadioni «Istiqlol»ga ko‘zdan kechirildi. Stadionning kiyim almashtirish xonalari va matbuot anjumani o‘tkaziladigan zallar o‘rganildi. Delegasiya vakillari barcha tashkiliy-ma’muriy zonalarni, xususan, OFK standarti asosida qayta tashkil etilgan mutlaqo yangi media tribuna va matbuot anjumani o‘tkaziladigan xonalarni ko‘zdan kechirishdi.

Shuningdek, jamoalar mashg‘ulot o‘tkazadigan maydonlarning ham OFK musobaqalar o‘tkazish standartiga muvofiqligi tekshiruvdan o‘tkazildi. Bu borada mutasaddilarga maydonlarning sifatiga alohida e’tibor qaratish kerakligi yana bir bor e’tirof etildi, rejaga muvofiq keyingi qilinishi kerak bo‘lgan vazifalar yuzasidan ko‘rsatma va tavsiyalar berildi.

Bundan tashqari, muxlislarga yaratilgan qulayliklar ko‘zdan kechirildi. Yirik turnirlarning muhim yo‘nalishlaridan hisoblangan tibbiy tayyorgarlik hamda VAR uchun zarur bo‘lgan sharoitlar nazoratga olindi.

O‘FA vakillari Farg‘onaga tashrif davomida viloyatda futbol rivojiga hissa qo‘shgan bir qator faxriylarni o‘zbek futbolining 110 yilligi munosabati bilan faxriy nishon hamda esdalik sovg‘alari bilan taqdirladilar.