Bugun tunda "Yuventus" "Alyans" stadionida "PSJ"ni qabul qilib, Chempionlar ligasining joriy mavsumdagi ishtirokini yakunlaydi.

Bugungi o‘yin oldidan bir nechta faktlarga to‘xtalib o‘tamiz:

"PSJ" Turinda "Yuventus"ni bir marta ham mag‘lub eta olmagan. Va umuman olganda joriy mavsumdagi g‘alaba parijliklarning "Yuve" ustidan qozongan ilk muvaffaqiyati bo‘ldi. 1997 yilda Turinda bo‘lib o‘tgan Yevropa Superkubogi uchun bahs bu jamoalarning Italiyadagi so‘nggi o‘yini bo‘lib turibdi - o‘shanda "byankonerilar" 3:1 hisobida zafar quchgan.

"PSJ"dan uchralgan YECHL birinchi o‘yinidagi mag‘lubiyat "Yuventus" uchun joriy mavsumdagi ilk mag‘lubiyat bo‘ldi, fransuzlar bilan uchrashuv oldidan Allegri shogirdlari A Seriyada ikkita o‘yinda g‘alaba qozongan va uchta durang qayd etgandi.

"PSJ" Chempionlar ligasi guruh bosqichidagi so‘nggi to‘rtta o‘yinda g‘alaba qozondi va kamida 4tadan gol urdi.

Lionel Messi, Neymar va Kilian Mbappe mavsum boshidan buyon "PSJ"ning Chempionlar ligasidagi 28 ta golidan 26 tasiga hissa qo‘shgan.

Kilian Mbappe ushbu musobaqaning guruh bosqichida 6 ta gol urdi va bu "PSJ" tarixidagi ikkinchi eng yaxshi natija. Leo Messi Chempionlar ligasining 4 ta uchrashuvida 7 ta foydali harakat amalga oshirgan (4 ta gol va 3 ta golli uzatma): argentinalik futbolchining eng yaxshi ko‘rsatkichi faqat 2016/17 yilgi mavsumda bo‘lgan, u 10 ta gol urgan va 2 ta golli uzatmani amalga oshirgan.