Hammaning xabari bor, «Arsenal» bu mavsumda o‘z tarixidagi eng yaxshi startni namoyish etdi. Statistikaga qarasak, «to‘pchilar» 2004 yildan beri Angliya chempionligini qo‘lga kiritmagan. Shu sababdan ham Gabriel Jezus, Bukayo Saka va Martin Edegor kabi jamoa yetakchilari Arteta qo‘l-ostida bor kuchi bilan harakat qilmoqda. «Arsenal» hozirga qadar 12 ta uchrashuvning 10 tasini g‘alaba bilan yakunlagan. Qolgan 2 tasida durang va mag‘lubiyatga uchragan. Bu safar super kompyuter ishga solinganida, u «Arsenal»ni APL chempioni bo‘lishini ko‘rsatdi. Quyida londonliklarning ehtimoliy chempionligi va bunga yetaklovchi omillar haqida so‘z boradi.
1992 yildan beri «Arsenal» 12 turdan ilk bor 31 ochko yig‘moqda. «Manchester Siti» chempion bo‘lgan yillarida o‘ziga xos statistikaga ega bo‘lgan. «Shaharliklar» 2011-12, 2017-18 yilgi mavsumda 34 ochko yig‘ishga erishgan. Aynan shunday natija 2019-20 yilgi mavsumda «Liverpul» tomonidan ham qayd etilgan. Bundan tashqari dastlabki 12 turda «Manchester Siti» (2018-19) va «Chelsi» (2014-15) 32 ochko to‘plagandi. Qiziqarlisi shundaki, yuqoridagi jamoalar o‘sha mavsumlar so‘ngida chempion bo‘lgan.
Shuningdek, APL jamoalari turli davrlarda 12 turdan keyin 31 ochkoga erishgan. «Chelsi» (2005-2006) va «Manchester Yunayted» (1993-94, 2006-2007) hozirgi «Arsenal» kabi ochkoga ega bo‘lgan va may oyida chempionlikni tantana qilgan. Ammo yana bitta jamoa borki, u 12 turdan 31 ochko olsada, titulga ega chiqa olmagan. O‘sha klub «Nyukasl»dir. «Qarg‘alar» 1995-96 yilda ikkinchi o‘rin bilan kifoyalanishga majbur bo‘lgandi.
«Nyukasl» o‘sha omadsiz mavsumda avgustdan to martning o‘rtalariga qadar yetakchilik qilgan. Ular yanvar oyida ikkinchi o‘rindagi «MYU»dan 12 ochko oldinda borayotgandi. Biroq, vaziyat taqozosi bilan mavsum so‘ngida 4 ochkolik farq bilan «qizil iblislar»dan ortda qoladi.
Bu voqea, shubhasiz, Mikel Arteta va uning shogirdlari nazaridan chetda qolmaydi. «Arsenal» ushbu tarixni qaytarmaslik uchun mavsum davomida qattiq harakat qiladi. Uning ortida esa hozir «Manchester Siti» kabi shavfqatsiz «mahluq» bor. «Kanonirlar» hafta so‘ngida «Chelsi» maydoniga safar qiladi. Mana shu o‘yin Arteta jamoasi irodasini yana bir bor sinovdan o‘tkazadi.
ISMATOV J.
