Iordaniyaning Amman shahrida boshlangan boks bo‘yicha Osiyo chempionatida bugun uchinchi kun janglari o‘tkazilmoqda. Dastur doirasida 5 nafar sportchimizning ringga ko‘tarilishi rejalashtirilgan bo‘lib, ulardan 3 nafari o‘z janglarini o‘tkazishdi.

51 kg. vaznda yurtimiz sharafini himoya qilayotgan Hasanboy Do‘smatov tailandlik Panmot Titisanga qarshi jang olib borib, ishonchli g‘alabani qo‘lga kiritdi — 5:0.

Ikki nafar hamyurtimiz esa, afsuski, imkoniyatni boy berib qo‘yishdi. -71 kg vaznli bokschimiz Havasbek Asadullayev ilk bosqichda mo‘g‘ulistonlik Byamba-Erdene Otgonbaatarga qarshi ringga ko‘tarildi 2:3 hisobida yutqazdi. Asadullayev uchun mazkur jang Osiyo chempionatidagi debyut edi.

Shuningdek, 48 kg vaznli Asilbek Jalilov ilk jangini qozog‘istonlik Sanjar Tashkenbayga qarshi o‘tkazdi va mag‘lubiyatga uchradi — 0:5. Shu tariqa, musobaqadagi O‘zbekiston - Qozog‘iston to‘qnashuvida hisob tenglashdi.