JCH-2022 o‘yinlarini kuzatish uchun Qatarga piyoda yo‘l olgan «Real» muxlisi - Santyago Sanches Eronda dom-daraksiz yo‘qolganligi aytilmoqda.

Har holda, 3 haftadan buyon undan biror xabar yo‘q. «Real» fanati 9 oy oldin Qatar tomon piyoda sayohatga chiqqan ekan. U Eronga kirishigacha naq 15ta mamlakatdan o‘tgan va o‘z yo‘nalishini ijtimoiy tarmoqlarda yoritib borgan.

Sanyago Sanches oxirgi marta Eron chegarasini kesib o‘tgani va dam olish uchun vaqtincha qarorgoh sifatida tog‘li hududni tanlagani haqida xabar qoldirgandi. Muxlis shundan buyon jim, ya’ni boshqa ma’lumot bergani yo‘q. AP xabarida aytilishicha, o‘sha hududdagi ferma xo‘jayini ispaniyalik sayohatchini o‘z uyiga olib kirgan, uni mehmon qilgan va yuvinib, dam olishiga sharoit yaratib bergan. Ammo Santyagoning yaqinlari shu-shu u bilan bog‘lanolmayotgan ekanlar.

Ta’kidlanishicha, Ispaniyaning Tehrondagi elchixonasi 3 haftadan beri bedarak yo‘qolgan fuqaroni qidirmoqda, ammo hozircha hech qanday natija yo‘q. Eslatish kerak, ayni payt Eronda ommaviy norozilik namoyishlari davom etmoqda. Santyagoning yaqinlari shuning uchun o‘n chandon xavotirdalar...