Eldor Shomurodov ortidan yevrofutbol markaziga talpinayotgan yigitlarimizdan biri Hojimat Erkinov ayni payt RPLda chakki taassurot qoldirmayapti.

Ha, milliy jamoamiz vingerining klubi — «Torpedo» chempionatda rosa qiynalmoqda, yaqqol autsayder bo‘lib turibdi. Shunga qaramay, muxlislar ham, mutaxassislar ham Hojimatning o‘yiniga yaxshi baho berishyapti. Hamyurtimiz yaqinda Rossiya futbolini yoritishga ixtisoslashgan matchtv.ru sayti mehmoni bo‘ldi va suhbat davomida kelajakda o‘z kuchini yevrofutbol markazida sinab ko‘rishga ishtiyoqmand ekanligini yashirmadi.

— Eldor Shomurodov kabi Italiya «A» seriyasida o‘ynash variantiga qanday qaraysan?
— Albatta, kuchli ligalardan birida to‘p surishni istayman. Kim ham Italiya, Angliya yoki Ispaniya chempionatiga borishni xohlamaydi? Qisqasi, hozirgi harakatim shunga qaratilgan.

— Xo‘sh, senga hamyurting kabi Joze Mou­rinyo bilan ishlash yoqadimi yoki Aleksey Miranchukdek Jan Pyero Gasperini qo‘l ostida...?
— Menimcha, Mourinyo bilan ishlash qiziqarliroq bo‘lsa kerak.

— Nega aynan «Benazir» bilan?
— Bolaligimdan uning faoliyatini kuzatib kelaman. Mourinyo ko‘plab katta klublarda yorqin iz qoldirdi. Shu jihatdan ham Joze qo‘l ostida shug‘ullanish qiziq.

— Mourinyo boshqargan jamoalardan qaysi biriga alohida muxlislik qilgansan?
— «Real»ga.

— O‘sha vaqt Mourinyo top-darajadagi murabbiy edi, shundaymi?
— Har holda, saviyasi ko‘pchilikda havas uyg‘otardi.

21 yoshli Hojimat Erkinov — «Paxtakor» akademiyasi tarbiyalanuvchisi. Katta futboldagi faoliyatining ilk qismida «Qo‘qon-1912» va AGMKda ijara muddatini o‘tadi va «Paxtakor»ga qaytib, asosiy o‘yinchilar qatoriga kirdi. «Torpedo» safiga esa iyul oyida qo‘shilib, 2025 yilning yozigacha mo‘ljallangan shartnoma ostiga imzo chekdi. Erkinov 2 yildan buyon O‘zbekiston milliy jamoasiga jalb etilmoqda. Bu vaqtda 13ta o‘yinda qatnashib, 1ta gol urdi.