So‘nggi bir-ikki hafta ichida futbol olamida katta voqealar sodir bo‘ldi. Shulardan biri, shubhasiz, Ronalduning "katta portlash"ni vujudga keltirgan intervyusi edi. Portugaliya terma jamoasi a’zosi Pirs Morgan bilan bo‘lgan suhbatda, o‘zining ta’biri bilan aytganda, ko‘plab haqiqatlarni ochib tashladi. Jumladan, Ronaldu 90 daqiqalik intervyu davomida "Manchester Yunayted"dagi barchani, ten Xagdan tortib, Gleyzerlarga qadar achchiq tanqid ostiga oldi. Ushbu voqea Jahon chempionati boshlanishiga bir hafta qolganida ro‘y berdi. Kontentning tizeri chiqqan paytdanoq, keng jamoatchilik buni muhokama qila boshladi. Ayrim mutaxassislar, xususan, sobiq "MYU" futbolchilari Ronalduni klubdan xaydash kerakligini bildirishdi. Albatta, aytishga oson. Ammo bu ish silliq kechmaydi. Yaqinda "Daily Mail" nashrida e’lon qilingan materialda "MYU"ning Ronaldu borasida qanday yo‘l tutishi bayon etildi. Unda, "MYU"ning Ronalduning agenti Mendesh bilan yaqin munosabatlari, 37 yoshli hujumchini "Old Trafford"dan ketkizishga yordam berishi mumkinligi aytiladi. Xabarda, jumladan, shunday deyiladi:
"Ular (klub rahbariyati) Ronalduning ushbu intervyusi uchun futbolchining agentini ayblayotgani yo‘q. Aksincha, Mendeshga yangi iltimos bilan chiqishmoqchi. "MYU" Ronaldu bilan tuzilgan bitimni muddatidan oldin bekor qilmoqchi va bunda Mendeshning yordamiga muhtoj. Ayni damdagi holatdan na "MYU", na Ronaldu va na Mendesh manfaatdor. Shunday ekan, masalani tezroq hal qilish lozim".
Bu vaziyat haqida sobiq ingliz futbolchisi Tim Shervud ham o‘z munosabatini bildirib o‘tdi. U shunday deydi: "Ronalduning aytgan gaplarini ta’sirli va haqli deb o‘ylamayman. U nima degani muhim emas, aslida. Uning buni qay yo‘sinda va qayerda aytgani muhimroq. U bu gaplarni namoyishkorona, omma oldida bayon qildi. Menimcha, Ronaldu bu qilmishi bilan o‘zining "Manchester Yunayted"dagi shonli tarixiga katta dog‘ tushirdi. Nafaqat, "MYU"dagi, balki APLdagi faoliyatiga ham. Bu gap so‘zlarni eshitgan va ko‘rgan Lionel Messi o‘z joyida o‘tirib, kulib qo‘ygandir. Kimdandir tarixdagi eng yaxshi futbolchi haqida so‘rasangiz, Messi yoki Ronaldu deydi. Menimcha, endilikda, Ronaldu deguvchilar ancha kamayadi. Hattoki, mening ham ichimda, Krishtianuning bu qilmishidan keyin Messiga moyillik kuchaydi".
ISMATOV J.
