Krishtianu Ronaldu bilan yaqin haftalar ichida yuz bergan voqealardan hammaning xabari bor. 37 yoshli futbolchi "Manchester Yunayted"dan achinarli tarzda ketdi. Bu voqea uning Pirs Morganga bergan "bomba" intervyusidan keyin ro‘y berdi. Endi uning Manchester shahrida qiladigan ishi yo‘q. Shu sabab u o‘z yurtiga qaytishi kerak. Bu esa futbolchining Angliyadagi oilasi va uy jihozlarini ham ko‘chirish kerakligini anglatadi.
Xabarlarga ko‘ra, Ronalduning narsalarini tashish uchun Manchesterning Cheshir mavzeyiga ulkan yuk tashuvchi avtomobil yuborilgan. Mashina Ronalduning 5 million funtlik koshonasidan futbolchining "lash-lushlar"ini yig‘ib qaytishi kerak edi. Ammo u mavzening tor ko‘chasiga sig‘may qolgan. Yuk avtomobili yo‘ldan burilishda muammoga duch kelgan shu sababli, manzilga yetmay, ortga qaytishga majbur bo‘lgan. Bir soatlik urinishlardan keyin, mashinaning muammoli ekani, u Cheshir yo‘llarida yurish uchun kattalik qilishi ma’lum bo‘lgan.
Endilikda, bu ishni bajarish uchun, hajmi kichikroq bo‘lgan transport vositasi kerak bo‘ladi. U Ronalduning xotini va 5 farzandi yashaydigan xonadonga yetib borib, narsalarni ortib qaytishi lozim. Manchesterdagi koshonada Ronalduning 150 ming funtlik "Cadillac Escalade" hamda 300 minglik "Bentley Flying Spur" rusumidagi avtolari bo‘lgan. Ular payshanba kuni transportyor orqali olib ketilgan edi. Ronalduning Manchesterdagi uyida, uning o‘zi qurdirgan qiymati 50 ming funtga teng bo‘lgan trenajor zali bor. Futbolchi va uning oilasi 5 millionlik koshonada ijara asosida, oyiga 40 ming funt to‘lab turar edi. "MYU" bilan bitim tugatilganidan keyin, Krishtianuning uyida allaqachon ko‘chish tashvishlari boshlanib ketgan.
Ronaldu "MYU"dan ketishi haqida shunday degandi: "Biz klub bilan kelishgan holda shartnomani tugatishga qaror qildik. Mening "Manchester Yunayted"ga, klub muxlislariga bo‘lgan mehrim hech qachon o‘zgarmaydi. Yangi sarguzashtlar izlash vaqti yetib kelgan ko‘rinadi. "MYU"ga kelajakda katta zafarlar tilab qolaman".
Ronaldu, "MYU" unga xiyonat qilganini, bosh murabbiy Erik ten Xagni hurmat qilmasligini bayon qilgani sababli o‘z jamoasidan xaydaldi. U ayni damda Qatardagi Jahon chempionatida ishtirok etmoqda. Uning jamoasi birinchi turni Ganaga qarshi g‘alaba bilan tugatdi (3-2).
ISMATOV J.
