"Real Madrid" allaqachon "Palmeyras" hujumchisi Endrikning transferi bo‘yicha kelishuvga erishgan, deya xabar beradi insayder Nikolo Skira.

"Qaymoqranglilar" futbolchi uchun 60 million yevro (bonuslar bilan birga) to‘laydi.

Endrik 2024 yilda 18 yoshga to‘lganda "Real"ga o‘tadi. U hozir shartnoma imzolaydi, ammo bu shartnoma faqat 2025 yilgacha hisoblab chiqiladi. Gap shundaki, braziliyalik voyaga yetmagani uchun uzoqroq mehnat shartnomasini imzolay olmaydi. Biroq, keyin shartnoma yana 5 yilga uzaytiriladi.

Qayd etilishicha, Endrik bilan “Real”dan tashqari “PSJ”, “Chelsi” va “Manchester Yunayted” klublari ham qiziqish bildirishgan. Shuningdek, “Barselona” bosh murabbiyi Xavi unga braziliyalik futbolchi kerakligini, kataloniyaliklar u va uning otasi bilan muzokara olib borayotganini aytdi. Biroq futbolchi Madrid klubiga o‘tishni tanladi.

Endrik “Palmeyras” safida 2022 yilning iyulidan buyon to‘p suradi va Braziliya klubi safida 16 ta o‘yinda maydonga tushib, 9 ta gol urdi va bitta golli uzatmani amalga oshirdi.