Xorvatiya terma jamoasi jahon chempionatining bronza medali uchun Marokashga qarshi bahsda ishtirok etib, g‘alabani qo‘lga kiritdi.

Yevropaliklar o‘yinni ancha faol boshlab, raqiblarini dovdiratib qo‘yishdi. Natijada ular 7-daqiqada hisobni ochishdi. Modrich tomonidan jarimadan yetkazilgan uzatmani Perishich bosh bilan 11 metrli nuqta atrofiga yetkazdi. Yoshko Gvardiol esa bosh bilan darvozani ishg‘ol qildi. To‘p to‘sinni silab to‘rga borib tushdi — 1:0.

Oradan 2 daqiqa o‘tib marokashliklar ham "standart"dan hisobni tenglashtirishdi. Jarimadan yetkazilgan uzatma Mayerning boshiga tegib yuqoriga ko‘tarildi. Doriy esa darvozaga yaqin masofadan bosh bilan darvozani zabt etdi — 1:1.

Birinchi bo‘lim tugashiga 2 daqiqa qolganida "shaxmatranglilar" yana oldinga o‘tib olishdi. Xorvatiyaning hujumi paytida afrikaliklar raqibning xavfli hujumini bartaraf etgandek bo‘lishgandi, ammo Bilol el-Xannus o‘z jarima maydoni tashqarisida to‘pni xorvatiyalik futbolchiga berib qo‘ydi. Jarima maydoniga o‘ng qanotdan kirgan Orshich uzatma berildi. Mislav esa "parashyut" zarba berishga qaror qildi. To‘p darvozabonning ustidan oshib o‘tib, ustunga tegib, chiziqni kesib o‘tdi — 2:1.

Ikkinchi taymda har ikka jamoada ikkitadan gol urish uchun imkoniyat yuzaga keldi. Xorvatlarda Orshich va Kovachichning zarbalariga aniqlik yetishmagan bo‘lsa, marokashliklarda En-Nesiriy ikkita imkoniyatdan foydalana olmadi. Yussufning bir zarbasini Livakovich mahorat bilan qaytargan bo‘lsa, o‘yinga qo‘shib berilgan 6-daqiqada hujumchining bosh bilan bergan zarbasiga biroz aniqlik yetishmadi.

Shu tariqa, Xorvatiya o‘z tarixida ikkinchi marta bronza medaliga ega chiqdi. Marokash esa turnirni 4-o‘rin bilan yakunladi.

JCH-2022. Bronza medali uchun bahs
Xorvatiya – Marokash 2:1 (2:1, 0:0)
Gollar: 1:0 – 7 Gvardiol, 1:1 – 9 Dariy, 2:1 – 42 Orshich.
Xorvatiya – Livakovich, Stanishich, Shutalo, Gvardiol, Perishich, Modrich, Kovachich, Mayer (Pashalich, 66), Kramarich (Vlashich, 61), Orshich (Yakich, 90), Livaya (Petkovich, 66).
Marokash – Bunu, Hakimiy, El-YAmiq (Amalloh, 67), Dariy (Banun, 64), Attiyatulloh, Amrabat, Sobiriy (Shoir, 46), El-Xannus (Unahiyo, 56), Ziyesh, Bufal (Zaruriy, 64), En-Nesiriy.
Ogohlantirishlar: Unahiy (69), Amalloh (84).