"Manchester Yunayted"ning sobiq hujumchisi Krishtianu Ronalduning agenti Jorje Mendesh o‘tgan yozda portugaliyalikga faoliyatini davom ettirish uchun 30 ta klubni taklif qilgan, deb xabar beradi CNN.

O‘tgan yozda, hujumchi "Manchester Yunayted"dan ketishga qaror qilganida, u Mendeshdan o‘ziga yangi klub topishni so‘ragan, deya xabar beradi manba. Agent hujumchiga tanlash uchun 30 ta jamoadan iborat ro‘yxatni taqdim etdi. Krishtianu undan 3 ta jamoa tanlab oldi va muzokaralarni Mendeshga ishonib topshirdi. Biroq agent bu uch klub bilan muzokaralarda muvaffaqiyat qozona olmadi. Shundan so‘ng Ronaldu yana 5 ta klubni tanladi, biroq ular bilan olib borilgan muzokaralar ham natija bermadi.

Qayd etilishicha, bundan keyin Mandesh va Ronaldu o‘rtasidagi munosabatlar yomonlasha boshlagan. Ronalduning ishlarini yuritishda sekin-asta asosiy rolni Saudiyaning “An-Nassr” klubi bilan muzokara olib borgan futbolchining do‘sti va o‘ng qo‘li Rikardu Regufe o‘z zimmasiga ola boshlagan.

Noyabr oyida Ronaldu "Manchester Yunayted" bilan shartnomasini bekor qildi va hozirda erkin agent hisoblanadi.