FIFA tomonidan 2023 yil uchun xalqaro maydonlarda ishlaydigan hakamlar, yordamchi hakamlar, VAR hakamlari, futzal va sohil futboli hakamlari ro‘yxati e’lon qilindi. Unga ko‘ra, mamlakatimizdan umumiy 30 nafar hakam ushbu ro‘yxatdan o‘rin olishgan.
E’tiborli tomoni, 2023 yilda FIFA hakamlarimiz qatorida yangi nomlarni uchratish mumkin. So‘nggi mavsumlarni muvaffaqiyatli o‘tkazib kelayotgan Rahimbek Karimov, shuningdek, yordamchi hakamlardan Avazbek Abdullayev va Zufar Eliboyev, futzal bo‘yicha Oybek Kallaxo‘jayev, sohil futbolida Nayim Qosimov kabi nomlarga ko‘zingiz tushadi. Bundan tashqari, Rahimbek Karimov va Abdurashid Xudoyberganov VAR hakamlari sifatida ro‘yxatdan o‘rin olishgan.
O‘zbekiston futbolida ayol hakamlarga qaratilayotgan e’tibor o‘z samarasini bermoqda. Joriy yildan boshlab Roziyabonu Yusupova xalqaro maydonlarda ayollar futboli bosh hakami sifatida ishlashi mumkin bo‘ladi. Shuningdek, Aleksandra Konchikova FIFA ayollar futzal hakami sifatida faoliyat olib borish imkoniyatiga ega bo‘ldi.
FIFA hakamlarimizning umumiy ro‘yxati bilan quyidagi suratda tanishishingiz mumkin.
