"Chelsi" va Fransiya terma jamoasining sobiq himoyachisi Vilyam Gallas Argentina va "Benfika" yarim himoyachisi Enso Fernandesning "Chelsi"ga o‘tishi mumkinligi haqida gapirdi.

Londonliklar futbolchiga asosiy da’vogar sifatida ko‘rilmoqda, avvalroq "Chelsi" Qatarda bo‘lib o‘tgan jahon chempionatining eng yaxshi yosh futbolchisi uchun 120 million yevro to‘lashga tayyor ekanliklari xabar qilingandi, biroq keyinroq "ko‘klar" "Benfika"ga 85 million yevro taklif qilgani ma’lum bo‘ldi.

"Savol Enso uchun bunday summa to‘lash to‘g‘rimi yoki yo‘qmi? O‘sha yoshida jahon chempionatida ko‘rsatgan ko‘rsatkichlari ajoyib, shuning uchun ham u turnirning eng yaxshi yosh futbolchisi sifatida e’tirof etildi. Uning bunchalik yoshligini bilmasdim. U jahon chempionatida g‘olib chiqqandek o‘ynadi, uning o‘yinini ko‘rish juda yoqimli. Lekin u bu pulga arziydimi, bilmayman.

Har bir futbolchi bir mavsumni muvaffaqiyatli o‘tkazishi mumkin. Qiyinchilik ikkinchi, uchinchi va to‘rtinchi mavsumni yuqori saviyada o‘tkazishda. Bu futbolchining narxini aniqlashning yagona yo‘li, lekin ikki o‘yindan keyin bunday miqdordagi summani so‘rash...? Bilaman, bu bozor qoidalari, lekin klub ehtiyotkor bo‘lishi kerak. Futbolchining Premyer-ligada qanday ishlashini bilmasdan turib, bu summani to‘lay olmaysiz. "Chelsi" ehtiyotkor bo‘lishi kerak. Ular ilgari bunday xatoga yo‘l qo‘yishgan, bu katta xavf" - dedi Gallas Genting Casino bilan suhbatda.