Yaqinlashib kelayotgan tennis bo‘yicha Avstraliya ochiq chempionati 2023 yilning dastlabki yirik musobaqalaridan hisoblanadi. Bu yil ham turnir shiddatli va murosasiz kurashlarga boy o‘tishi kutilmoqda.

O‘tgan yil serbiyalik Novak Jokovich viza bilan bog‘liq muammolar sabab musobaqani o‘tkazib yuborgan edi. Bu yil boshqa bir yulduz, ayni paytda jahon tasnif jadvalini boshqarib borayotgan ispaniyalik Karlos Alkaras jarohati sabab «Katta dubulg‘a» turnirida qatnashmaydigan bo‘ldi.

Xo‘sh, joriy yil 111-bor o‘tkaziladigan musobaqa haqida yana nimalarni bilamiz?

Turnir o‘tadigan sana: 16-29 yanvar.

Sovrin jamg‘armasi: 51,5 million AQSH dollari. Yakkalik yo‘nalishida g‘alaba qozonadiganlar 2,054 million dollarga ega bo‘lishadi. Asosiy davraning 1-bosqichida mag‘lub bo‘lgan sportchi 75 160 dollar bilan qaytadi.

Amaldagi g‘oliblar: Rafael Nadal (Ispaniya); Eshli Barti (Avstraliya); N.Kiryos / T.Kokkinakis (Avstraliya); B.Kreychikova / K.Sinyakova (Chexiya); K.Mladenovich (Fransiya) / I.Dodig (Xorvatiya).

G‘olib uchun reyting ochko: 2000

Mazkur musobaqa saralash bosqichida hamyurtlarimizdan Nigina Abduraimova ishtirok etadi. Ayni paytda jahon reytingida 180-pog‘onada turgan tennischimiz ertaga birinchi o‘yinini ispaniyalik Leyre Gormazga (169) qarshi o‘tkazadi.

Musobaqani o‘tkazib yuboradigan taniqli sportchilar: Karlos Alkaras (Ispaniya), Gael Monfis (Fransiya), Simona Xalep (Ruminiya), Naomi Osaka (Yaponiya).