Milanning “Inter” klubi “Roma” himoyachisi Kris Smollingni o‘z safiga qo‘shib olish borasida muzokaralarni boshladi. Bu haqda italiyalik jurnalist Nikola Skira xabar berdi.

Manbaga ko‘ra, "neradzurrilar" Smolling transferini yozda, ya’ni angliyalik futbolchi erkin agentga aylanganda rasmiylashtirmoqchi. Futbolchining o‘zi, avval xabar qilinganidek, hozirgi klubi bilan shartnomani uzaytirishga shoshilmayapti. Shuningdek, “Inter” Smollingga mavsumiga 3,5 million yevro maosh bilan 2025 yilgacha shartnoma taklif qildi. Qayd etilishicha, angliyalik himoyachiga "Inter" klubidan tashqari Turinning “Yuventus” klubi ham qiziqish bildirmoqda.

33 yoshli Smolling “Roma”da 2019 yildan buyon o‘ynab kelmoqda. Himoyachi 2019/2020 yilgi mavsumni Rim jamoasida ijara asosida o‘tkazdi, shundan so‘ng u Italiya klubiga to‘liq o‘tdi. Smolling joriy mavsumda 24 ta o‘yinda 3 ta gol urdi.