«Manchester Yunayted» «Kristal Pelas»ga qarshi o‘yinida (2:1) yarim himoyachi Kazemironing qizil kartochkasi bo‘yicha hakamlar qo‘mitasiga e’tiroz bildirmaydi.

Bu haqda «qizil iblislar» bosh murabbiyi Erik ten Xag ma’lum qildi. Shu tariqa futbolchi «Lids» bilan navbatdagi APL o‘yinini o‘tkazib yuboradi.

«Biz mumkin bo‘lgan murojaatni ko‘rib chiqdik. Men uchun arbitrning qarori to‘g‘ri emas, lekin menimcha, bizda unga qarshi shikoyat qilish imkoniyati yo‘q», - dedi Ten Xag.

Braziliyalik futbolchi har ikki jamoa futbolchilari o‘rtasida sodir bo‘lgan yirik to‘qnashuvda maydondan chetlatildi. «Kristal Pelas» yarim himoyachisi Jeffri Shlupp vinger Entoniga qo‘pollik ishlatdi, shundan so‘ng yakunda bu katta mushtlashuvga aylandi.

Uning davomida Kazemiro «burgutlar» futbolchilaridan birining bo‘ynidan ushlab oldi, yakunda bu holat VARda hakamlar nazaridan chetda qolmadi.

Bosh hakam Andre Marriner braziliyalik futbolchiga qizil kartochka ko‘rsatdi.