Yurgen Kloppning ilk mavsumidagi bir o‘yin ko‘p eslanadi. «Vest Bromvich» bilan. «Enfild»da o‘tgan uchrashuvda mehmonlar 2:0 hisobida oldinga chiqib olishadi. Ammo so‘nggi daqiqalarda «Liverpul» o‘yinni qutqarib qoladi - 2:2.

Yurgen Klopp o‘sha durangni muxlislari bilan shunday nishonlaydiki, ko‘pchilikning ensasi qotgani tabiiy: bir durangga shunchami? Kloppni «Liverpul» nega olib kelgandi o‘zi, tavba...

Lekin gap durang yo ochkoda emasdi. Shu tariqa Klopp shogirdlariga bir narsani uqtirgan - «Hech qachon mag‘lubiyatni tan olmang. Qog‘ozdagi ochko emas, maydonda bajarilgan vazifa sizga kayf bersin». Ha, agar bu tomondan olib qarasa, 0:2 ni 2:2 ga aylantirish zo‘r voqea. Amalga oshirilgan qiyin vazifa. Arziydi.

Bu xarakter keyin ham yordam berdi, masalan o‘sha mavsumning o‘zida «Borussiya» bilan o‘yindan boshlanib, keyinroq, «Barselona» bilan kambekni eslang. Agar harakat qilsak, qo‘limizdan kelmaydigan ish yo‘q - bu «Liverpul»ning shioriga aylanib qoldi.

Erik ten Xagning «MYU»si katta haftani o‘tkazdi. Avval «Barselona» ustidan Yevropa Ligasidagi g‘alaba, endi finalda «Nyukasl» mag‘lub etildi.

Bir qaraganda, Yevropa Ligasi, Liga kubogi... Nafaqat kichikroq, balki top klublar ustidan biroz mazax qilinadigan turnirlar. Ammo bu o‘yinlar shu qadar muhim ediki, agar jamoa qandaydir yo‘lning boshida turgan bo‘lsa, «Barselona»ni yutish top o‘yinlarga qo‘shimcha ishonch, Liga kubogi esa, kattaroq sovrinlarni yutishga to‘rtki bo‘ladi, axir bu tarkibda De Xea, Shou va Reshforddan boshqa hech kim Angliyada turnir yutmagan. Beixtiyor Fergyusonning «biz «Siti»ga APLni yutishga imkon bermasligimiz kerak, agar mazasini bilib qolishsa, keyin ularni to‘xtatib bo‘lmaydi» degan gapi yodga tushadi. Bu xavotir naqadar to‘g‘ri bo‘lganini hozir ko‘rib turibmiz...

Xullas. Liga Kubogi kichik turnir. Lekin ba’zida mana shunaqa kattalashib ketadi. Xuddi mashhur kinoda Ayyubiyning Quddusga bergan ta’rifi kabi:

«Hech narsa... Ayni damda hamma narsa!»

Qahramon Aslanov