O‘zbekiston yoshlar terma jamoasi bosh murabbiyi Ravshan Hayrdarov Indoneziyaga qarshi bo‘lib o‘tgan uchrashuvdan so‘ng matbuot anjumanida ishtirok etdi.

O‘yin haqida:
— Indoneziyaga qarshi o‘yin biz uchun juda muhim edi. Shu sababli bor e’tiborimizni mazkur o‘yinga qaratgan edik. Uchrashuvda g‘alaba qozonishni maqsad qilgandik, biroq bir nechta vaziyatlardan foydalana olmadik. Raqiblarimiz ham ajoyib o‘yin ko‘rsatishdi, ular himoyada ancha tartibli o‘ynashdi.

Tarkibdagi o‘zgarishlar haqida:
— Biz bugun durang uchun maydonga tushmadik, shunchaki bir nechta futbolchilarimizga dam olish imkoniyatini taqdim qildik. Bundan tashqari, bilasiz, rotasiya ham muhim hisoblanadi. Bu orqali kam o‘ynayotgan futbolchilarimizga o‘yin amaliyotini berishni maqsad qilgandik. Aytganimdek, barchasi reja asosida amalga oshirildi. O‘ylashimcha, bugun maydonga tushgan futbolchilar o‘zlarini yaxshi tomonlama ko‘rsatishdi.

Umarali Rahmonaliyev haqida:
— Bugun u yaxshi o‘yin ko‘rsatdi. Raqiblarimiz himoyada zich o‘ynagani tufayli zonalar ochish, vaziyat yaratishda qiyinchiliklar bo‘ldi. Biroq biz bir nechta yaxshi vaziyatlarga ega bo‘ldik. Masalan, Ahrorovda ham ajoyib imkoniyat bo‘ldi, lekin bu gol bilan tugamadi. Umuman olganda, bugungi o‘yin yaxshi o‘tdi. Biz bu o‘yinni ko‘rib chiqamiz va tahlil qilamiz.

Avstraliyaga qarshi kechadigan keyingi uchrashuv haqida:
— Eng avvalo tiklanish jarayonlari ustida ishlaymiz. Bilasiz, chorak finaldagi o‘yin juda muhim hisoblanadi. Raqibga keladigan bo‘lsak, ularda yaxshi jamoa shakllangan. Biz reja asosida ishlashda davom etamiz. Raqiblarimizni o‘rganib va tahlil qilib boramiz. Umuman olgan, ushbu o‘yinga ham har tomonlama tayyorgarlik ko‘ramiz.