«Yuventus» vingeri Anxel di Mariya jamoasining mavsumdagi maqsadlari haqida gapirdi.
Argentinalik futbolchining goli «byankonerilar»ga Turinda bo‘lib o‘tgan Yevropa ligasi 1/8 finalining ilk o‘yinida Germaniyaning «Frayburg» klubi ustidan minimal hisobda g‘alabani ta’minladi.
«Bugun gol urib, jamoaga yordam berganimdan xursandman. Mavsum oxirigacha xuddi shunday ruhda davom etaman degan umiddaman.
Biz Yevropa ligasida g‘alaba qozonish uchun qo‘limizdan kelganini qilamiz – bu Italiya kubogi bilan bir qatorda asosiy maqsadlarimizdan biri.
Ikkala turnirda ham g‘alaba qozonishga harakat qilamiz», dedi 35 yoshli futbolchi Sky Sport nashriga o‘yindan keyin bergan intervyusida.
«Frayburg» va «Yuventus» o‘rtasidagi javob uchrashuvi 16 mart kuni Germaniyada bo‘lib o‘tadi.
