Madridning “Real” klubi “PSJ” hujumchisi Kilian Mbappe oldiga shart qo‘ydi. Fransiyalik futbolchi "qirollik klubi"ga o‘tishi uchun Parijni tark etish istagini oshkora e’lon qilishi kerak. Bu haqda Marca nashri xabar bermoqda.
Eslatib o‘tamiz, Mbappe o‘tgan yozda erkin agent sifatida "Real"ga o‘tishi mumkin edi, ammo so‘nggi lahzada u fikrini o‘zgartirib, "PSJ" bilan shartnomasini uzaytirishga qaror qildi. Endi Kilian bu xatosini tuzatib, yana "qaymoqranglilar" safiga o‘tmoqchi.
Mbappe kecha Fransiya chempionatida "Brest"ga qarshi o‘yinda "PSJ"ga g‘alaba keltirgan gol muallifi bo‘ldi. Kilian klub safidagi 203-golini urdi. Fransuz o‘z jamoasi tarixidagi eng yaxshi to‘purar hisoblanadi.