«Mash’al» — «Dinamo» (1:3) o‘yinidan keyingi matbuot anjumanida dastlab Vadim Abramov qatnashib, savollarga javob qaytardi.

— Birinchi navbatda mavsumning ochilish o‘yini bilan barchani, muxlislarni tabriklayman. Ilk tur doim qiyin o‘tgan. Chempionat boshlanishi 2-3ta o‘yin og‘ir bo‘ladi. Keyinchalik moslashib ketiladi. Natijamiz yaxshi, lekin o‘yinimiz borasida kamchiliklarimiz bor.  Futbolchilarga rahmat aytaman, qanday o‘ynash kerak bo‘lsa, shunday harakat qilishdi.

— Jamoadagi legionerlarning harakatidan qoniqdingizmi?
— Legionerlar yaxshi o‘ynashdi. O‘zlarini ko‘rsata olishdi. Biroq 3:0 vaqtida futbolchilar biroz noto‘g‘ri o‘ynashdi. Bu xavotir oladigan jihat. Birinchi bo‘limda ham vaziyatlar bo‘ldi, shoshildik. «Mash’al» bilan hammaga qiyin kechishi aniq. Natijadan mamnunman.

— «Dinamo» 2-bo‘lim boshidagi 8 daqiqa ichida 3ta gol urib, o‘yin taqdirini hal qildi. Tanaffusdan keyin hujumkor o‘ynash o‘yin rejasi edimi?
— Yo‘q, vaziyatlarni o‘yin davomida ham yaratdik. Ammo o‘sha 8 daqiqa ichida yigitlar yaratilgan vaziyatlar va imkoniyatni qo‘ldan chiqarishmadi.

— Jamoa oldiga qanday maqsad qo‘yilgan?
— Endi birinchi o‘yin yakunlandi. Bu haqda gapirishga erta, deb o‘ylayman. Hammasini vaqt ko‘rsatadi, kamroq gapirib, ko‘proq ishlashimiz kerak.