O‘zbekiston milliy terma jamoasi Jidda shahrida Venesuelaga qarshi o‘rtoqlik uchrashuvini o‘tkazib, jangovar durangga imzo chekdi.

Uchrashuvning 6-daqiqasida Lotin Amerikasi vakillari hisobni ochishdi. O‘ng qanotdan uyushtirilgan hujumni Alexandro Gonsales samarali yakunladi.

Shundan so‘ng maydonda teng kurash kechdi, o‘yin tempi yuqori bo‘ldi va jamoalar vaziyatlar yaratishdi. Taymga qo‘shib berilgan 2 daqiqa yakunlanayotgan paytda hakam Venesuela darvozasi tomon penalti belgiladi. Boisi, himoyachi o‘z jarima maydonchasi ichida Shomurodovni tortib yiqitdi.

Penalti tepish mas’uliyatini Masharipov o‘z zimmasiga oldi. Jaloliddin "panenka" zarba bilan darvozabonni aldadi, ammo to‘p to‘singa tegib, yuqoriga ko‘tarilib ketdi.

Ikkinchi bo‘limning 60-daqiqasida Katanes birdaniga 4 futbolchini almashtirdi. O‘runov, Turg‘unboyev, Sobirxo‘jayev va Abduxoliqovning tushirilishi natijasida tezlikni oshirdik. Oradan ko‘p o‘tmasdan Fuentes Turg‘unboyevga nisbatan qo‘pollik ishlatdi hamda ikkinchi sariq kartochkani olib maydonni tark etdi.

Shundan so‘ng tashabbus to‘laligicha biznikilar tomoniga o‘tdi. Bahsning 79-daqiqasida esa Yaxshiboyev penalti ishladi. Uning o‘zi 11 metrli jarima zarbasini aniq amalga oshirib hisobni tenglashtirdi.

Venesuela qolgan daqiqalarda durangni saqlab olish o‘ynadi va o‘z maqsadiga erishdi.

Shu tariqa, O‘zbekiston Saudiyaga yig‘in doirasida Boliviyani mag‘lub etib, Venesuela bilan durang o‘ynadi.

Xalqaro o‘rtoqlik o‘yini
O‘ZBEKISTON - VENESUELA - 1:1 (0:1)
Gollar: Jasurbek Yaxshiboyev (79-penalti) — Alexandro Gonsales (6)
Noaniq penalti: Jaloliddin Masharipov (45+3, to‘sin)