«Real Madrid» sardori Karim Benzema o‘ng qo‘lida maxsus bog‘ich bilan o‘ynashda davom etmoqda: 2019 yilning yanvarida fransiyalik futbolchi «Betis» himoyachisi Mark Bartra bilan to‘qnashib ketganidan keyin kichkina barmog‘ini sindirib olgandi.

O‘shanda 35 yoshli hujumchiga jarrohlik amaliyotini o‘tkazish tavsiya qilingan, ammo bu holatda u ikki oyga yaqin maydonga tusha olmas edi.

Benzema davolanishni kechiktirishga qaror qildi va madridliklarning «Sevilya»ga qarshi o‘yinida o‘ng qo‘lida bandaj bilan maydonga qaytdi.

Fransiya terma jamoasining sobiq futbolchisi 2018/19 yilgi mavsumdan so‘ng muvaffaqiyatli jarrohlik amaliyotini boshdan kechirdi, biroq reabilitasiya jarayonida shoshildi.

Marca xabariga ko‘ra, Benzema qaytganidan so‘ng qo‘lidan yana bir zarba olgan va o‘shandan beri bog‘ichda yuribdi.

Aftidan, «Oltin to‘p» sohibi buni o‘z imidjining bir qismiga aylantirganga o‘xshaydi.

2021 yil oktabr oyida Chempionlar ligasi o‘yini oldidan bo‘lib o‘tgan matbuot anjumanida Benzema qo‘lini yana jarohatlagani uchun boshqa operasiya qilishga ulgurmaganini aytdi.

O‘shanda Karim: «Yana operasiya qilinardim, ammo undan keyin ikki oy o‘ynay olmasligimni aytishdi», deb javob berdi.

«Men barmog‘imni yana jarohatladim, lekin mavsum davomida to‘xtab, boshqa operasiyaga rozi bo‘lmadim, shuning uchun har o‘ynaganimda bandaj taqib olaman», — dedi futbolchi.

Hushyor muxlislar Karimning barmog‘i qanchalik deformasiyalanganini payqashadi.