Niderlandiyalik mutaxassis Erik ten Xag "Manchester Yunayted" boshchiligidagi debyut mavsumida barcha musobaqalarda eng ko‘p g‘alaba qozonish bo‘yicha rekord o‘rnatdi, deb xabar beradi klub rasmiy sayti.
Angliya Premyer-ligasining 36-turidan o‘rin olgan "Vulverxempton"ga qarshi o‘yindagi g‘alaba (2:0) "qizil iblislar" uchun joriy mavsumdagi barcha turnirlardagi 38-g‘alabasi bo‘ldi. "Manchester Yunayted" tarixidagi hech bir murabbiy debyut mavsumida bunday natijaga erisha olmagan.
Avvalgi rekord portugaliyalik murabbiy Joze Mourinyo ga tegishli edi. 2016/2017 yilgi mavsumda "Manchester Yunayted" portugaliyalik boshchiligidagi barcha musobaqalarda 37 ta o‘yinda g‘alaba qozongan. Mourinyo klub murabbiyi sifatidagi birinchi mavsumida jamoa bilan uchta sovrinni qo‘lga kiritgandi: u Yevropa Ligasi, Angliya Ligasi kubogi va Angliya Superkubogini yutgan.
Joriy mavsum oxirigacha “Manchester Yunayted”ni Premyer-liganing uchta o‘yini va “Manchester Siti”ga qarshi Angliya kubogi finali kutib turibdi, shuning uchun ten Xagda debyut mavsumidagi g‘alabalar soni bo‘yicha yetakchilikni mustahkamlash imkoniyati bor.
