Yevropa chempionlar ligasi yarim final bosqichi javob o‘yini doirasida «Manchester Siti» va «Real Madrid» jamoalari o‘rtasidagi bahs naq finalga teng bo‘ldi. Birinchi uchrashuvda durang qayd etilgach, barchasi "Etixad stedium"da bo‘lishi kerak edi.

Gvardiola esa "Madrid" uchun yaxshi syurpriz tayyorlab qo‘yganini ko‘rsatib qo‘ydi. "Shaharliklar" birinchi bo‘limda "Real"ning ko‘z ochishiga, nafas olishiga yo‘l qo‘ymadi. Shiddatli hujumlar, yuqori pressing natijasida Anchelotti jamoasining o‘yini deyarli chiqmadi. Tanaffusga qadar "Siti" Bernardu Silva tomonidan urilgan 2 ta gol evaziga oldinga o‘tib oldi. Hisob yanada firik ko‘rinishga kelishi mumkin edi, ammo Kurtua 3 ta seyv namoyish etdi.

Tanaffusdan so‘ng "Real" vaziyatni o‘nglashga harakat qildi, oldinga intildi. Ammo "Siti" himoyasi bugun deyarli bexato o‘ynadi. Boz ustiga, Gvardiola shogirdlari kerakli paytda to‘pni nazorat qilib, o‘yin tempini tushirib turdi. Bahsning 77-daqiqasida Kevin de Bryuyne jarima zarbasini amalga oshirgan paytda Eder Militao o‘z darvozasiga to‘pni kiritib qo‘ygach, amalda o‘yin taqdiri hal bo‘ldi. Boz ustiga, ikkinchi bo‘limga qo‘shib berilgan daqiqalarda Xulian Alvares yakkama-yakka vaziyatga chiqib ketdi va hisobni 4:0 ko‘rinishga keltirib qo‘ydi.

Shu tariqa, "Manchester Siti" murakkab raqib to‘sig‘idan o‘ta oldi va finalga chiqdi. Finalda esa jamoani "Inter" kutib turibdi. Final 10 iyun kuni Istanbuldagi Otaturk stadionida bo‘lib o‘tadi.

Yevropa chempionlar ligasi, yarim final, javob o‘yini
Manchester Siti Angliya – Real Madrid Ispaniya 4:0 (2:0)
Gollar: 1:0 – 23 Bernardu Silva, 2:0 – 37 Bernardu Silva, 3:0 – 76, avtogol Militao, 4:0 – 90+1 Alvares.
Manchester Siti – Ederson, Uoker, Ruben Diash, Akandji, Stounz, Gyundogan (Marez, 79), de Bryuyne (Foden, 84), Grilish, Bernardu Silva, Rodri, Xoland (Alvares, 89).
Real Madrid – Kurtua, Karvaxal (Vaskes, 80), Alaba, Militao, Kamavinga (Tchuameni, 80), Modrich (Ryudiger, 63), Kroos (Asensio, 70), Valverde, Vinisius Junior, Rodrigo (Sebalyos, 80), Benzema.
Ogohlantirishlar: Ruben Diash (50), Karvaxal (55), Gyundogan (62), Kamavinga (75), Grilish (90).