Kubok doirasidagi «Dinamo» — «Lokomotiv» (3:1) uchrashuvidan keyin Vadim Abramov matbuot anjumanida ishtirok etdi.

— Biz hozir eng yaxshi sport formamizda emasmiz, shu sababli xavfsirab turgandim, ammo yigitlardan minnatdorman. Ular kuchini ishga solishdi, omadimiz ham keldi. Ularning darvozaboni xatoga yo‘l qo‘ydi. Umuman olganda bugun ikkita teng jamoa to‘qnash keldi. "Lokomotiv" yaxshi jamoa, ular to‘g‘ri o‘ynashyapti, qiyinchilikka uchradik.

— Tarkibdagi rotasiya jamoa muddatdan avval 1/8 finalga chiqqani bilan bog‘liqmi yoki Buxoroda ochko yo‘qotilgach, shunday qarorga keldingizmi?
— Ha, 1/8 finalga muddatdan avval chiqqanimiz bilan bog‘liq. Bizda o‘yinlar juda kam. Tarkibimizda maydonga tushmaganlar bor. Kimga ishonish mumkinligini aniqlash uchun ularni sinovdan o‘tkazdik.

— Bugun Bahodir Valiyev mavsumda ilk marta maydonga tushdi...
— Ha, birinchi o‘yinida hayajonlangani sezilib turdi. Ko‘p harakat qildi, hammasi o‘xshamagan bo‘lsada katta hajmdagi vazifani bajardi.

— Bugun yigitlaringiz vazifalarni to‘liq bajarishdimi yoki kamchiliklar kuzatildimi?
— Hozir yaxshi formada emasmiz. Yanada ishonchliroq harakat qilishlarini xohlayman. Har bir jamoa raqib unga qanday imkon berishiga qarab o‘ynaydi.

— Muxlislar bugun yosh o‘yinchi Akmal Kozimov va Erkin Boydullayevlarni kutishgandi. Ammo ular tarkibda yo‘q...
— Bilasiz, qaydnomaga 20 kishini kiritish mumkin. Shu sababli ularni tarkibga qo‘sha olmadik. Imkoni boricha hozir yaxshi sport formada bo‘lgan va jamoaga yordam bera oladiganlarni tarkibga kiritdik.

— Transferlar?
— Birinchi davrada yana 2ta o‘yin bor, shundan so‘ng futbolchilarni ko‘rib chiqamiz. To‘g‘ri, yaxshi shogirdlarim bor, ammo ular Pro ligada o‘ynashni xohlashmayapti.

— 2005 yilda O‘zbekiston Kubogi finalida "Traktor" bilan, keyin "Lokomotiv" bilan kubokni qo‘lga kiritgansiz. "Dinamo" bilan bu ishni takrorlay olasizmi?
— Hammasi yaratganning irodasi bilan sodir bo‘ladi. Ko‘ramiz, hozir bir narsa deyish qiyin, endigina guruhdan chiqdik.

— 1/8 finalda qaysi jamoaga qarshi o‘ynashni istardingiz?
— Kuchsizroq raqib bo‘lishini. Buni barcha murabbiy istaydi. Ammo kim tushishidan qat’iy nazar qiziq bo‘ladi. Muxlislarni maydonga chorlay oladigan jamoa bo‘lsa yaxshi bo‘lardi.

— "Navbahor" tushsa-chi?
— Agar "Navbahor" bo‘lsa... "Navbahor" o‘zbek futbolining flagmani. Hozirdanoq "qaltirayapmiz". Namangan klubi va "Paxtakor" ikkinchi o‘rinni olishdimi? Agar bilganimda ikkinchi o‘rinni olgan bo‘lardik. Albatta, hazil, — deydi Vadim Karlenovich.