"Real" va "Fenerbaxche" Gyulerning transferi bo‘yicha 20+10 million yevroga kelishib oldi, deb xabar berdi xorij manbalari. Unga ko‘ra, yigitcha bugun, payshanba kuni Ispaniya poytaxtiga yo‘l oladi.
Xabaringiz bor, “Barselona” umidli yarim himoyachiga jiddiy da’vo qilgandi. ESPN xabariga ko‘ra, Arda boshqa klublar e’tiborini tortgach, Madrid klubi futbolchining transferini tezlashtirgan. Mundo Deportivo xabariga ko‘ra, Gyulerning Madridga o‘tishi "Fenerbaxche"ning rejalarini barbod qildi. Manbaga ko‘ra, turk klubi yosh futbolchini "Real"dan ko‘ra "Barsa"ga sotishni afzal ko‘rgandi. Gap shundaki, "ko‘k-anorranglilar" futbolchini bir mavsum uchun "Fenerbaxche"da ijarada qoldirishni rejalashtirgan, deb yozdi Mundo Deportivo. “Qirollik klubi” esa Ardani hozirdanoq jamoada ko‘rmoqchi. ESPN esa “qaymoqranglilar” yarim himoyachini boshqa klubga ijaraga berishini istisno qilmayapti, deya yozmoqda. Shu tariqa, Gyulerning "Real"ga o‘tishi "Fenerbaxche"ni zudlik bilan unga o‘rinbosar izlashga majbur qilmoqda. Bu esa Istanbul klubining rejalariga umuman to‘g‘ri kelmagan.
Qolaversa, “Fenerbaxche” prezidenti Ali Kochning “Barselona” bilan biznes aloqalari bor edi. Turk tadbirkori 2022 yilgacha "Barsa" homiysi bo‘lgan Beko kompaniyasini boshqargan. Koch Gyulerdan g‘azablangan, chunki yigit Kataloniyani emas, balki Madridni tanlagan, deb yozdi Mundo Deportivo. Manbaning qo‘shimcha qilishicha, transfer bo‘yicha yakuniy qarorni futbolchining o‘zi qabul qilgan, shuning uchun “Fenerbaxche” uni “qaymoqranglilar”ga sotishga rozi bo‘lishga majbur bo‘ldi.
Mundo Deportivo gazetasining yozishicha, Koch kelishuv yakunlangach, Gyulerning transferi tafsilotlarini oshkor qilishga va’da bergan.
