"Реал" ва "Фенербахче" Гюлернинг трансфери бўйича 20+10 миллион еврога келишиб олди, деб хабар берди хориж манбалари. Унга кўра, йигитча бугун, пайшанба куни Испания пойтахтига йўл олади.
Хабарингиз бор, “Барселона” умидли ярим ҳимоячига жиддий даъво қилганди. ESPN хабарига кўра, Арда бошқа клублар эътиборини тортгач, Мадрид клуби футболчининг трансферини тезлаштирган. Mundo Deportivo хабарига кўра, Гюлернинг Мадридга ўтиши "Фенербахче"нинг режаларини барбод қилди. Манбага кўра, турк клуби ёш футболчини "Реал"дан кўра "Барса"га сотишни афзал кўрганди. Гап шундаки, "кўк-анорранглилар" футболчини бир мавсум учун "Фенербахче"да ижарада қолдиришни режалаштирган, деб ёзди Mundo Deportivo. “Қироллик клуби” эса Ардани ҳозирданоқ жамоада кўрмоқчи. ESPN эса “қаймоқранглилар” ярим ҳимоячини бошқа клубга ижарага беришини истисно қилмаяпти, дея ёзмоқда. Шу тариқа, Гюлернинг "Реал"га ўтиши "Фенербахче"ни зудлик билан унга ўринбосар излашга мажбур қилмоқда. Бу эса Истанбул клубининг режаларига умуман тўғри келмаган.
Қолаверса, “Фенербахче” президенти Али Кочнинг “Барселона” билан бизнес алоқалари бор эди. Турк тадбиркори 2022 йилгача "Барса" ҳомийси бўлган Беко компаниясини бошқарган. Коч Гюлердан ғазабланган, чунки йигит Каталонияни эмас, балки Мадридни танлаган, деб ёзди Mundo Deportivo. Манбанинг қўшимча қилишича, трансфер бўйича якуний қарорни футболчининг ўзи қабул қилган, шунинг учун “Фенербахче” уни “қаймоқранглилар”га сотишга рози бўлишга мажбур бўлди.
Mundo Deportivo газетасининг ёзишича, Коч келишув якунлангач, Гюлернинг трансфери тафсилотларини ошкор қилишга ваъда берган.
