AQSH futbol chempionati ancha yillardan beri o‘ziga dunyoning eng yirik yulduzlarini jalb etib kelmoqda. 2023 yilda bu borada eng katta yurishni "Inter Mayami" klubi qildi. Devid Bekxem jamoasida barcha davrlarning eng yaxshi futbolchisi bo‘lgan Lionel Messi hamda uning do‘sti Serxio Buskets to‘p tepadi. Tabiiyki, ular katta maosh evaziga ishlaydi. Quyida MLSning yirik shartnomalarga ega yulduzlari ro‘yxatini tuzdik.
10. Kristian Benteke – "Di-Ci Yunayted", 85 245 dollar
"Liverpul" va "Kristal Pelas"ning sobiq hujumchisi Amerikada o‘z to‘purarlik mahoratini namoyish etmoqda. Belgiyalik futbolchi o‘tgan yozda okeanortiga yo‘l olgandi. U 20 ta MLS o‘yinida 8 ta gol va 2 ta assistga mualliflik qildi. Bentekening haftalik maoshi 85 ming funtdan ko‘proqdir.
9. Duglas Kosta – "LA Gelaksi", 86 698 dollar
Kosta Yevropaning "Shaxtyor", "Bavariya" va "Yuventus" kabi klublarida harakat qilgan. 32 yoshli yarim himoyachi jarohatlar sabab yuqori darajaga chiqishga qiynalgandi. Braziliyalik futbolchi 2022 yilning iyulidan beri MLSda harakat qiladi. Bir yil ichida u 39 ta o‘yinda 5 ta gol va 5 ta assist qayd etdi.
8. Ektor Errera – "Xyuston Dinamo", 100 901 dollar
Errera Xyuston jamoasiga 2022 yilda "Atletiko"dan olib kelingandi. Birinchi mavsum meksikalik futbolchi uchun oson kechmadi. U 2023 yilning o‘zida 17 ta o‘yinda maydonga tushib, 3 ta gol va 6 ta assist qayd etdi.
7. Sebastyan Driussi – "Ostin", 115 817 dollar
Bu futbolchi ko‘pchilikka yaxshi tanish emas. Ammo u "River Pleyt"da ancha vaqt faoliyat yuritgan. Driussi 2022 yilda 25 ta golga mualliflik qildi. Joriy yilda esa yarim himoyachi hisobida 15 ta o‘yinda 4 ta gol mavjud. Bunday sermahsullik 27 yoshli futbolchini Yevropa sari boshlashi ham mumkin.
6. Federiko Bernardeski – "Toronto", 121 065 dollar
Top-darajada bo‘lishiga qaramay, Bernardeski 2022 yilda "Yuventus"ni tashlab ketganida, hamma hayron qolgandi. Yarim himoyachi Kanada klubida 34 ta o‘yib o‘tkazib, 22 ta golga mualliflik qildi. Tabiiyki, u MLSda katta maosh oladi. Joriy yil ham futbolchi o‘zining omadli mavsumini davom ettirmoqda.
5. Xavyer Ernandes –"LA Gelaksi", 143 149 dollar
Ernandes Meksika tarixidagi eng yaxshi futbolchilardan biri sanaladi. U kelayotgan dekabr oyida erkin agentga aylanadi. Shundan so‘ng, hujumchi futboldan ketishi kutilmoqda. Ayni damda har hafta Ernandes 143 ming dollar ishlab topadi.
4. Lorenso Insinye – "Toronto", 144 230 dollar
Yana bir A seriyani tashlab ketgan yulduz Insinye edi. U 2022 yilda Kanadaga yo‘l oldi. Bu mavsumda sobiq "Napoli" hujumchisi 15 ta o‘yinda 4 ta gol va 2 ta assist qayd etdi. Uning jamoasi hozirda Sharqiy konferensiyaning so‘nggi pog‘onalarida bormoqda.
3. Jerdan Shakiri – "Chikago Fayr", 157 692 dollar
APL muxlislari bu futbolchini yaxshi tanishadi. Shakiri 2022 yilning fevralidan beri MLSda harakat qilmoqda. 31 yoshli yarim himoyachi butun faoliyatida "Bavariya", "Bazel" va "Liverpul" bilan jami 18 ta titulni qo‘lga kiritgan. Shu sababli hozir u Amerikadagi eng ko‘p maoshga ega uchinchi futbolchidir.
2. Serxio Buskets – "Inter Mayami", 192 307 dollar
Bu mavsumda MLS uchun eng yulduzli tarkib Mayami shahrining "Inter" jamoasidir. Buskets yaqindagina "Barselona"dan olib kelindi. U Ispaniyada 15 yil davomida 32 sovrin yutgan. Shulardan 7 tasi La-liga tituli bo‘lsa, 3 tasi YECHLnikidir. Buskets mayamiliklar bilan ikki yarim yillik shartnoma imzoladi.
1. Lionel Messi – "Inter Mayami", 1 million 57 ming dollar
Messi AQSHdagi eng katta maoshga ega futbolchiga aylandi. Endi u ikki yildan ko‘p vaqt davomida har haftada 1 million dollardan ziyod maosh oladi. Bu summa yiliga 60 millionga yaqin pul bo‘ladi. Albatta, jahon chempionining bunga haqqi bor. U "Barselona" va "PSJ" bilan jami 34 ta titulga erishdi. Messi "Inter Mayami"ga kelishidan oldin "Al-Hilol"dan kelgan 1.3 milliard dollarlik shartnomani rad etgan edi. Endi argentinalik hujumchi Amerikada 21 iyul kuni o‘z debyutini o‘tkazadi.
ISMATOV J.
