Sankt-Peterburgning "Zenit" jamoasi hujum chizig‘i yetakchisi Malkom faoliyatini Saudiya Arabistoni chempionatida davom ettirishi mumkin. Bu haqda futbol agenti Timur Gurskaya aytib o‘tdi.
“Bizda Malkom Saudiya Arabistoniga ketish arafasida ekanligi haqida ma’lumotlar bor. Deyarli 50 millionlik taklif olindi", dedi Gurskaya telegram kanalida.
Agent shuningdek, braziliyalik hujumchining maoshi yiliga 10-12 million yevroni tashkil etishini ham qayd etgan.
26 yoshli braziliyalik futbolchi 2019 yilning avgust oyidan buyon "ko‘k-oq-ko‘klar" safida to‘p tepmoqda. Uning shartnomasi 2027 yilning iyun oyi oxirigacha amal qiladi.
O‘tgan mavsumda Malkom 27 uchrashuvda 23 ta gol urib, RPLning eng yaxshi to‘purari bo‘ldi.