Kuni kecha "Andijon" a’zosi Sherzod Esanovning “Olimpik” klubiga ko‘chib o‘tishi bo‘yicha muzokaralar olib borilayotgani xususida xabar bergandik. Shuni ma’lum qilamizki, ikkala tomon bir to‘xtamga keldi va Esanov ikkinchi davrani “Olimpik” jamoasida o‘tkazadi.

Ijara shartnomasi 10 iyul kuni har ikkala klub tomonidan rasmiylashtirildi. Shunday ekan, Esanov rasman “Olimpik” a’zosiga aylandi.

Ta’kidlash joizki, “Olimpik” jamoasi ikkinchi davraga tayyorgarlikni bugun, 11 iyuldan boshlaydi hamda 12 iyul kuni Turkiyaga o‘quv-mashg‘ulot yig‘inini o‘tkazish uchun jo‘nab ketishi rejalashtirilgan.

Ma’lumki, 20 yoshli iqtidorli yarim himoyachi “Andijon” safiga o‘tgan yilgi mavsum boshida qo‘shilgan. O‘shanda Pro ligada “Andijon” tarkibida 17 ta o‘yinda maydonga tushib raqiblar darvozasiga 2 ta gol urgan. O‘zbekiston Kubogi doirasida esa 1 ta o‘yinda 1 ta gol muallifiga aylangan. Tabiiyki, jamoamizning Superliga yo‘llanmasi qo‘lga kiritilishida ushbu yarim himoyachining ham hissasi bor. Bu yil esa Esanov Superligada debyutini o‘tkazdi va “Andijon” tarkibida 5 ta bellashuvda qatnashdi.

Xabaringiz bor, Esanov bu yil O‘zbekiston U-20 terma jamoamiz safida Osiyo chempionligini qo‘lga kiritdi va Argentinada o‘tkazilgan mundialda yurtimiz sharafini himoya qildi.

"Andijon" matbuot xizmati.