Xorvatiya terma jamoasi 2022 yilgi jahon chempionatida to‘rt yil avval Rossiyadagi jahon chempionatida erishgan shov-shuvli muvaffaqiyatini deyarli takrorladi. JCH-2018da “shahmatchilar” finalgacha yetib borgan va u yerda Fransiyaga imkoniyatni boy bergandi. Qatarda ham ularni bo‘lajak chempionlar (argentinaliklar) to‘xtatdi, ammo yarim finalda. Natijada Zlatko Dalich shogirdlari bronza medali uchun bahsda g‘alaba qozonib, uchinchi o‘rinni egalladi. Qishki turnirning asosiy qahramonlaridan biri xorvatiyalik darvozabon Dominik Livakovich bo‘ldi.
Sofascore sayti statistik ma’lumotlariga ko‘ra, Livakovich Qatarda bo‘lib o‘tgan jahon chempionatida seyvlar soni bo‘yicha eng yaxshi darvozabon bo‘ldi - 25.
Qolaversa, bir oy oldin Xorvatiya terma jamoasi Livakovich bilan Millatlar ligasi finaliga chiqqandi. Ushbu turnir darvozabonning yuqori reytingini yanada oshirishi kerak edi. Shunga qaramay, Dominik hali ham o‘z vatanida Zagrebning "Dinamo" jamoasida o‘ynamoqda. Ammo Xorvatiya chempionati oliy liga bo‘lishdan yiroq. UEFA klublar reytingida u atigi 19-o‘rinni egallab turibdi.
Livakovich allaqachon 28 yoshda. U terma jamoadagi debyutini bir-ikki yil oldin emas, 2017 yilda o‘tkazgan. Rossiyada bo‘lib o‘tgan jahon chempionatida u Subashichning o‘ribosari bo‘lgan, ammo o‘sha turnirdan so‘ng u Xorvatiya terma jamoasining birinchi raqamiga aylandi. Bundan tashqari, Dominik ancha boy Yevropa tajribasiga ega: Chempionlar ligasi guruh bosqichida 16 ta o‘yin va Yevropa ligasining guruh va pley-off bosqichida 29 ta o‘yin o‘tkazgan. Darvozabonning klassi shubhasiz, u ham yetakchilik fazilatlariga ega so‘nggi to‘rt yil ichida unga jamoa sardori vazifasi ishonib topshirilgan.
Nega Livakovich hali ham kuchli ligada emas? Bu savol, shu jumladan, futbolchining vatanida ham ko‘p beriladi. Masalan, Vecernji.hr sayti shu yilning bahorida jurnalistlar Dominikning muvaffaqiyatsiz transferini muhokama qilgan maqola chop etdi.
Xorvatiyalik mutaxassis shunday dedi: "Menimcha, Livakovichning takliflari bor edi, lekin u faqat ketish uchun ketishni istamaydi. Olingan takliflar uni ham, klubni ham qoniqtirmagani aniq. U butun vaqt davomida "Dinamo"da yaxshi o‘ynadi. Xorvatiya terma jamoasida ham ajoyib maqomga ega".
Xorvatiya matbuotiga ko‘ra, "Dinamo" Livakovichni sotishdan kamida 10 million yevro ishlab olmoqchi. Bu miqdor uning 2024 yilning yoziga qadar amal qiladigan shartnomasida ko‘rsatilgan. Klub Dominiksiz ikkinchi saralash bosqichidan boshlaydigan Chempionlar ligasining guruh bosqichiga chiqish juda qiyin bo‘lishini tushunadi. Qolaversa, "Dinamo" qishki oynada asosiy futbolchilar Mislav Orsich va Aryan Ademini sotib yubordi. Xorvatiyaliklar uchun chiqish transferlari byudjetni to‘ldirishning muhim manbai bo‘lib qolmoqda.
Agent Marko Naletilich Xorvatiya saytiga bergan intervyusida: “Livakovichning narxi anchadan beri yuqori bo‘lib kelgan. Darvozabonlarni sotish unchalik oson emas ularni har bir transfer oynasida ommaviy sotib olishmaydi. U tarkibdan joy uchun kurashadigan ikkinchi emas, birinchi darvozabon bo‘lishi kerak. Darvoza chizig‘idagi reaksiyaga ko‘ra, u dunyoning eng yaxshi darvozaboni. Bu bugungi bozordagi eng kuchli darvozabonlardan biridir”.
Albatta, Livakovich atrofidagi mish-mishlar yetarlicha. JCH-2022dan keyingi qishki oynada "Chelsi" va "Bavariya" xorvat bilan qiziqqan.
Yozgi oynada "Vilyarreal" Livakovich uchun asosiy nomzod sifatida ko‘rsatilgan, ammo ispan klubi atigi 8 million yevro va bonuslar taklif qilgan. Qolaversa, “Fiorentina” va “Fenerbaxche” bilan muzokaralar olib borilayotgani, shuningdek, “MYU” Dominikni jamoaning yangi zaxira darvozaboni sifatida ko‘rayotgani haqida ma’lumotlar bor edi.
