«Chelsi» tarbiyalanuvchisi Meyson Maunt rasman «MYU» safiga qo‘shildi.

 «Qizil iblislar» futbolchi transferiga bonuslar bilan birga 60 million funt sterling (55+5) to‘lashadi. Yarim himoyachi 2028 yilning iyun oyigacha mo‘ljallangan shartnomaga asosan haftasiga 250-300 ming funt (bonuslar bilan birga) miqdorida maosh oladi. Kelishuv bandiga muvofiq, tomonlar hamkorlik muddatini yana 1 mavsumga cho‘zishlari mumkin. E’tiborli tomoni, Meyson yangi klubida tirik afsona Krishtianu Ronaldu ketganidan buyon bo‘sh turgan 7-raqam ostida to‘p suradi.

«Chelsi» muxlislari esa hozir o‘zlarini qo‘yarga joy topolmayaptilar. Yo‘q, ular aslida Meysonning ketish qarorini to‘g‘ri qabul qilishdi. Faqat futbolchi xayrlashuv videomurojatini 1 oy oldin yozgani oydinlashgach, munosabat mutlaqo o‘zgardi. Londonliklarga Mauntning iloji boricha tezroq «MYU»ga o‘tishni xohlagani tinchlik bermayapti, chog‘i.

«Oxirgi 6 oy davomida ro‘y bergan voqealarni hisobga olsak, ketish haqidagi qarorim sizlarni ajablantirmasa kerak. Ammo bu holat «Chelsi» bilan osongina xayrlashishimni anglatmaydi aslo. Sizlarni yozma xayrlashuvdan ko‘prog‘iga munosib ko‘rdim va 18 yil davomida qo‘llab-quvvatlaganingiz uchun videomurojaat bilan minnatdorchilik bildirishni lozim topdim. Bilaman, ba’zi muxlislar qarorimdan mamnun bo‘lmaydilar, ammo tushuning, faoliyatimning hozirgi bosqichida menga shunday o‘zgarish kerak. «Chelsi»ga 6 yoshda keldim va ortda qolgan yillar ko‘p voqealarni birga boshdan o‘tkazdik: yoshlar birinchiligidagi g‘alaba va yilning eng yaxshi futbolchisiga atalgan sovrin, keyin cuperkubok va Klublar o‘rtasidagi JCHda zafar... Albatta, CHL kubogini qo‘lga olganimiz ham unutilmas voqea... Sizlarga eng yaxshi tilaklarni ravo ko‘raman» - Mauntning «ko‘klar» muxlislariga yo‘llagan videomurojaatida hammasi joyida. Ammo...

Meyson «MYU» bilan shart­noma tuzib bo‘lgach, «Chelsi»ning Karringtondagi bazasida ko‘rinish berdi. Ehtimolki, transferning yakuniy hujjatlarini to‘g‘rilash uchun kelgandir. «Chelsi» muxlislari esa bitta jihat - futbolchining soch turmagiga e’tibor qaratishdi. Shu tariqa kichik «tekshiruv» olib borildi va xayrlashuv videomurojaati deyarli 1 oy oldin yozib qo‘­yilgani aniqlandi. Qisqasi, videolavha va bazada ko‘ringan Mauntning soch turmaklari o‘rtasida osmonu yerchalik farq bor...