Superliganing 15-turidan o‘rin olgan “Metallurg” – “Navbahor” (1:1) o‘yinidan keyingi matbuot anjumanining birinchi qismida mehmonlar bosh murabbiyi Samvel Babayan ishtirok etib, OAV xodimlarining savollariga javob berdi.

Samvel Vyacheslavovich odatdagidek, o‘z so‘zini uchrashuv haqidagi fikrlari bilan boshladi.          

— So‘nggi o‘yinlar juda qiziqarli va keskin kurashlar ostida o‘tmoqda. Barcha shu jumladan, mezbonlar ham yuqoridagi kayfiyatda. “Metallurg” turnir jadvalining ikkinchi qismida bormoqda va mezbonlarga ochko juda muhim. Shu sababli, ushbu bahsning qiyin kechishini bilgandik. Umuman olganda, jamoamiz reja asosida o‘ynayotgandi. Gol urdik, bundan tashqari, yaxshi vaziyatlarimiz ham bo‘ldi.

Uchrashuvning ikkinchi bo‘limida ham gol urishimiz va o‘yinni mantiqan yakunlashimiz kerak edi. Biroq buning uddasidan chiqa olmadik. Bekobodliklarga tan berish kerak, ular oxirigacha kurashishdi. Afsuski, qo‘pol xatolar bois, bahs yakunida o‘z darvozamizdan to‘p o‘tkazib yubordik.

Bu futbol, bunaqasi bo‘lib turadi. Menimcha, aybni o‘zimizdan qidirishimiz va taxlil qilishimiz kerak. Qizil olgan futbolchimiz o‘yinni kuchaytirish uchun maydonga tushirilgandi, ammo, afsuski, barchamizni qiynab, maydonni erta tark etdi. Umuman olganda, yigitlarga e’tirozim yo‘q. Barchada bosim bor. Oldinga intilishda davom etamiz. Xatolarni to‘g‘rilash uchun ishlaymiz va har tomonlama izlanamiz.

— “Navbahor” oxirgi bahslarda kam gol urib, kichik hisoblarda g‘alaba qozonmoqda. Bu sizni xavotirga solmayaptimi?
— Yigitlarga kam gol uringlar, deb aytmayapmiz. Shunchaki vaziyatlardan foydalana olmayapmiz. Muammo mana shunda. Albatta, o‘yinlarni yaqqol ustunlik bilan yakunlashni istaymiz. Bugun ham ikkinchi va uchinchi gollarni urishimiz mumkin edi. Afsuski, tarkibda sifatli futbolchilarimiz ko‘p bo‘lsa-da, hujumlarni yakunlashda katta muammolarimiz bor.

— Ikkinchi bo‘limda “Navbahor” futbolchilarining vaqt cho‘zishlari sababi, natijani ushlab qolishmidi yoki bu jarohatlarga bog‘liqmi?
— Yigitlar hech qachon vaqt cho‘zishmaydi. Buning barchasi jarohat bilan bog‘liq. Bularni tibbiy shtabimiz bilan ko‘rib chiqishimiz kerak.

“Navbahor” PFK matbuot xizmati.